Oblys ákiminiń orynbasary Júsip Jumaǵulov málim etkendeı, búginde oblysta 463 ÚEU tirkelgen, onyń 80-i aýyldyq eldi mekenderde jumys isteıdi. 15 qoǵamdyq keńes bar.
«Bul uıymdar áleýmettik qorǵaýdan bastap bilim, densaýlyq, ekologııa, jastar saıasaty, quqyq qorǵaýǵa qatysty qyzmetterdi atqarady. Bıyl jergilikti bılik usynylǵan 126 jobany qarjylandyrýǵa 453 mln teńge qarajat bóldi», dedi ol.
Sonymen qatar spıker qoǵamda ádilettilik qaǵıdalaryn qalyptastyratyn ortaq qundylyqtar jóninde aıtty.
«Qoǵam men azamattyq sektordyń qatysýymen ǵana joǵary sapaǵa qol jetkizýge bolatyn tazalyq, kóshe tártibi, aýlalar belsendiligi, ulttyq qundylyqtardy baǵalaý, patrıottyq tárbıeni jandandyrý, úlkenderdiń ozyq tájirıbesin paıdalaný sııaqty isterdi biliktilikpen qolǵa alsaq, tıisti nátıjege qol jetkize alamyz. Sondaı ozyq tájirıbeniń biri jaqynda Esil aýdanyndaǵy Eńbek aýylynda qolǵa alyndy. Turǵyndar alkogoldi ishimdikten jappaı bas tartý týraly bastama kóterip, ony chellendj arqyly taratyp júr. Búginde oblystyń 18 aýyly bastamany qoldap otyr», dedi J.Jumaǵulov.
Qazirde kún tártibiniń aldyńǵy qatarynda turǵan «Zań jáne tártip» qaǵıdaty qoǵam dertiniń aldyn alýǵa, sonyń ishinde turmystyq zorlyq-zombylyq, vandalızm, esirtki taratýshylyq pen lýdomanııany boldyrmaýǵa baǵyttalǵan. Bul rette Alına Orlovanyń turmystyq zorlyq-zombylyqqa qarsy kúrespen aınalysatyn «Áıelderdi qoldaý ortalyǵynyń» jumysy atap ótildi.
Mádenıet jáne aqparat vıse-mınıstri Aızada Qurmanova Soltústik Qazaqstan oblysy ÚEU jumysyna qanaǵattanarlyq baǵa berdi.
«Qazir ÚEU jumystaryna Úkimet qatty kóńil bólip otyr. Prezıdent tapsyrmasymen zańnama jetildirildi. Ásirese áleýmettik mańyzy bar jobalardy qoldaý artyp keledi», dedi A.Qurmanova.
«Jergilikti ózin-ózi basqarý ınstıtýtyn damytý» jekemenshik mekemesiniń tóraǵasy, Soltústik Qazaqstanda Azamattyq alıanstyń qurylýynyń bastaý kózinde bolǵan Sergeı Hýdıakov oblystaǵy ÚEU qurylý tarıhyna tereńnen toqtalyp ótti.
«Senimen Bolashaq» RQU avtory, quryltaıshysy Nurbek Asanov baıandamasynda otbasyndaǵy syılastyq pen birlik barlyq jaqsylyqtyń bastaýy ekenin alǵa tarta kelip, elimizdiń 16 óńirinde bala tárbıesine erekshe mán beretin ÚEU qurǵandaryn málimdedi. «Otbasynda meıirim kórmegen baladan, áleýmettik jelide úzdiksiz kórsetiletin zorlyq-zombylyqtan kóz almaıtyn jasóspirimnen jaqsy azamat shyqpaıdy. Sol turǵyda aýlalyq uıymdar, fýtbol komandalaryn quryp, jarystar ótkizip jatyrmyz», dedi ol.
Jalpy otyrys aıaqtalǵan soń, forým jumysy paneldik sessııalarda jalǵasty. Qorytyndysynda Soltústik Qazaqstannyń 11 ÚEU-sy úzdik dep tanylyp, oblys ákimi atynan marapattar tabystaldy. Sonymen qatar «Qazaqstannyń azamattyq alıansy» qaýymdastyǵynyń prezıdenti Baný Nurǵazıeva 11 qatysýshyny alıanstyń 20 jyldyǵyna oraı dıplomdarmen marapattady.
Soltústik Qazaqstan oblysy
