Foto: Úkimettiń baspasóz qyzmeti
Úkimet ózin-ózi jumyspen qamtyǵandarǵa salyq salý erekshelikterin eskere otyryp, platformalyq jumyspen qamtýdy teń dárejede retteýdi jolǵa qoıý boıynsha jumys júrgizip otyr. Bul rette Yandex Qazaqstan júzege asyryp jatqan bastama erekshe bir mańyzǵa ıe.
Aıta keteıik, Iаndeks Taksı elimizdegi alǵashqy salyq agenti bolyp otyr. О́tken jyldyń qyrkúıek aıynda iske qosylǵan sátten bastap platformaǵa qatysýshylardyń jalpy sany 86 myń adamǵa jetken. Jobany damytýǵa 4,9 mlrd teńgeden astam qarjy ınvestısııalandy, al agent retinde kompanııadan 4,3 mlrd teńge salyq ustalyp, bıýdjetke aýdarylǵan.
«Memleket basshysy Qasym-Jomart Toqaev azamattarǵa yńǵaıly bolý úshin sıfrlyq sheshimderdi qarqyndy túrde engizýdi tapsyrdy. Platformalyq jumyspen qamtýdy retteý barysyn tıimdi etý úshin Úkimet áleýmettik qorǵaýǵa, salyq salýǵa jáne ózin-ózi jumyspen qamtyǵandar men frılanserlerdiń quqyqtyq mártebesine jańasha ádispen qaraýǵa múddeli. Atalǵan sektordy kóleńkeden shyǵarý jáne ekonomıkaǵa belsendi túrde tartý úshin 2026 jylǵy 1 qańtardan bastap jańa salyq rejımine birtindep kóshý mańyzdy. Bul jerdegi másele bizdiń júzdegen myń azamattarymyzdyń qyzmetine qatysty bolyp otyr», dedi Oljas Bektenov.
Iаndeks bas dırektory Danııl Shýleıko bizdiń elmen áriptestik jemisti júzege asyp jatqanyn atap ótip, kompanııanyń tehnologııalyq bastamalaryn damytýdy jalǵastyrý nıetin jetkizdi.
Odan bólek, kezdesý barysynda qalaaralyq jolaýshylar tasymaly servısin damytý josparlary da qaraldy. Búgingi tańda Yandex Qazaqstan elimizdegi negizgi baǵyttardyń basym bóligin qamtyp otyr.
«Joldardaǵy qaýipsizdik máselelerine de basa nazar aýdaryldy. Jolaýshylar men júrgizýshilerdiń qaýipsizdigi úshin júrgizýshi kýálikterin tekserý engizildi, selfı-baqylaý jáne avtomobılderdi turaqty fototekserý júrgiziledi. Avtomatty basqarý júıesi jyldamdyqty, júrgizýshilerdiń sharshaý deńgeıin jáne basqa da parametrlerdi baqylaıdy. Shtattan tys jaǵdaılar men JKO naqty ýaqyt rejıminde tirkeledi, sondaı-aq marshrýttan aýytqýlar jáne basqa da táýekelder baqylanady. Kompanııa júzege asyratyn basqa da tehnologııalyq bastamalarǵa nazar aýdaryldy. Máselen, pılottyq rejımde 1414 baılanys ortalyǵy arqyly qazaq jáne orys tilderinde sóıleıtin jasandy ıntellekt negizindegi daýystyq kómekshi engizilýde. Qala kartasynda shuǵyl jedel járdem shaqyrýlaryn vızýalızasııalaý jobasy ázirlenip jatyr», delingen habarlamada.
Kezdesý qorytyndysy boıynsha taraptar birlesken jumysty jalǵastyrýǵa daıyn ekenderin bildirdi. Premer-mınıstr sıfrlyq jobalardy birlesip júzege asyrý boıynsha jaýapty vedomstvolarǵa birqatar tapsyrma berdi.
