Elimiz derbes komanda retinde alǵash ret 1993 jyly AQSh-tyń Býfallo qalasynda ótken Dúnıejúzilik ýnıversıadada baq synady. XVII márte jalaýy jelbiregen jarysty jerlesterimiz bir kúmis medalmen qorytyndylady. Jalǵyz júldeniń ıegeri – úsh qarǵyp sekirýden álem chempıonatynyń qola júldegeri, Eýropa chempıony Oleg Sakırkın. Keıinnen ol Azııa oıyndarynyń jeńimpazy atandy.
1995 jyly Fýkokada qos kúmiske qol jetkizdik. Ony bıiktikke sekirýshi Svetlana Zalevskaıa men sýǵa sekirýshi Irına Vygýzova ıelendi. 1997 jyly Sısılııadan, 1999 jyly Palma-de-Malorkadan qorjynymyz bos qaıtsa, 2021 jyly Beıjińde úsh sportshymyz ekinshi orynǵa taban tiredi. Olar – jeńil atletter Gennadıı Chernovol (100 metrge júgirý), Evgenıı Meleshenko (400 metrge kedergiler arqyly júgirý), gımnastshy Ernar Erimbetov (qoldy tirep sekirý).
Alǵash ret Ýnıverısadada altyn medaldyń syńǵyryn 2003 jyly Tegýde estidik. Ońtústik Koreıanyń eń kórikti qalalarynyń birinde jalaýy jelbiregen jarysta Ernar Erimbetov erledi. 23 jastaǵy almatylyq saıypqyran sporttyq gımnastshylar saıysynda eki ret jeńis tuǵyrynyń eń bıik satysyna kóterilip, taǵy bir jattyǵýda kúmispen kúpteldi. Sondaı-aq Ernardyń komandalyq áriptesi Stepan Gorbachev, taekvondoshy Erkin Aısa, jelaıaq Denıs Rypakov ekinshi oryndy enshiledi. 2 altyn men 4 kúmistiń arqasynda elimizdiń quramasy jalpy komandalyq esepte 18-orynǵa taban tiredi.
2005 jyly Túrkııanyń Izmırinde Marǵulan Ásebekovtiń asyǵy alshysynan tústi. 96 kg salmaq dárejesinde kúsh synasqan elimizdiń tanymal grek-rım kúresi sheberi barlyq qarsylasyn qapy qaldyryp, bas júldeni qanjyǵasyna baılady. 200 metrge brass ádisimen júzgen Vladıslav Polıakov máre syzyǵyn ekinshi bolyp qıyp ótse, gımnastshy Ernar Erimbetov brýsıada kúmis, qoldy tirep sekirý jattyǵýynda qola medaldy moınynda jarqyratty. Sondaı-aq úshinshi oryndy ıelengender qatarynda Andreı Svatkovskıı (erkin kúres), Asqar Júrsimbaev, Erbol Qońyratov (grek-rım kúresi), Tatıana Roslanova (jeńil atletıka), Álııa Iýsýpova (kórkem gımnastıka) syndy sportshylar bar.
2007 jyly Bangkokta elimizdiń ánurany bes márte shyrqaldy. Taılandtyń bas shaharynda jeńil atletter Olga Rypakova (uzyndyqqa sekirý), Olga Tereshkova (400 metrge júgirý), Tatıana Azarova (400 metrge kedergiler arqyly júgirý), Marına Aıtova (bıiktikke sekirý), nysana kózdeýshi Iýrıı Iýrkov (MV-6 jattyǵýy) aldyna jan salmady. Ermek Jaqııarov, Iýrıı Iýrkov, Alekseı Kleımenov (nysana kózdeý, komandalyq MV-6 saıysy), Vladımır Isachenko, Sergeı Vohmıanın, Aleksandr Vohmıanın (nysana kózdeý, komandalyq saıys), Anna Ýstınova (jeńil atletıka, bıiktikke sekirý), Ámına men Mádına Raqym (tennıs, juptyq báseke) kúmis alsa, Vladıslav Polıakov (júzý, 200 metr brass), Lııa Nurkına (taekvondo, 67 kg), Dmıtrıı Grıaznov (semserlesý, shpaga), Erbolat Iýsýpov (dzıýdo, +100 kg), Álııa Iýsýpova (kórkem gımnastıka) qolaǵa qol sozdy. Nátıjesinde, 16 (5 altyn+4 kúmis+7 qola) júlde alǵan jerlesterimiz jalpy esepte 11-orynǵa kóterildi.
2009 jyly Belgradta 1 altyn, 2 kúmis, 4 qola medal ıelendik. Serbııanyń astanasynda taekvondoshy Gúlnafız Aıtmuhambetovaǵa teń keler eshkim tabylmady. Bıiktikke sekirýshi Ekaterına Evseeva men dzıýdoshy Baqytjan Tórebekov ekinshi oryn alsa, Álııa Iýsýpova, dzıýdoshy Gúljan Isanova, kórkem gımnastshylar men dzıýdoshylardyń erler quramasy úzdik úshtikti túıindedi.
2011 jyly Shenchjende otandastarymyzǵa bas júlde buıyrmady. Qytaı elinde Aleksandra Aborneva (aýyr atletıka), Natalıa Ivonınskaıa (jeńil atletıka, 100 metrge júgirý), Marııa Dmıtrıenko (stend atý) kúmisti, Olga Tereshkova (jeńil atletıka, 400 metrge júgirý), Evgenıı Ektov (jeńil atletıka, úsh qarǵyp sekirý), Aleksandr Ermakov (nysana kózdeý) qolany qanaǵat tutty.
2013 jyly Qazanda 30 (2+11+16) júldege qol jetkizdik. Alaıda altynnyń azdyǵynan komandalyq esepte 19-orynda qalyp qoıdyq. Tatarstannyń bas shaharynda Margarıta Mýkasheva (jeńil atletıka, 800 metrge júgirý) men Aleksandra Malınovskaıanyń (nysana kózdeý) mereıi ústem boldy.
2015 jyly Kvandjýda (Ońtústik Koreıa) 6 altyn, 4 qolany oljalaǵan otandastarymyz 11-oryndy ıelendi. Jarysta Dmıtrıı Balandın (júzý, 100 metr, brass), Vıktorııa Zıabkına (jeńil atltetıka, 100 ben 200 metrge júgirý), Nursultan Mamaı (taekvondo), Nıkıta Fılıpov (jeńil atltetıka, syryqpen sekirý) ozsa, jeńil atletterdiń 4h100 metrlik estafetasynda da shashamyzǵa shań juqtyrmadyq.
2017 jyly Taıpeıde 16 (3+6+7) jerlesimiz jeńis tuǵyryna kóterildi. Bas júldeniń barlyǵyn da aýyr atletter jeńip aldy. Olar – Albert Lınder, Aıdar Qazov, Denıs Ýlanov.
2019 jyly Neapolda (Italııa) 1 altyn, 5 kúmis, 1 qola medal enshiledik. Apennın túbeginde ánuranymyzdy asa aýyr salmaqta aıqasqan dzıýdoshy Ǵalymjan Qyryqbaı ǵana shyrqatty. Mılad Karımı, Narıman Qurbanov (sporttyq gımnastıka), Mıhaıl Lıtvın (jeńil atletıka), Smaıyl Dúısebaı (taekvondo), Zoıa Kravchenko (stend atý) kúmis, Sársengúl Rysbekova (stend atý) qola medaldy ıelendi.
2023 jyly Chendýdegi (Qytaı) Ýnıversıadada myna sportshylarymyz el senimin aqtady: altyn – Rıta Bákisheva (taekvondo), Mılad Karımı (sporttyq gımnastıka), kúmis – Nıkıta Chırıýkın (nysana kózdeý), Dıana Tursynbek (sadaq atý), Mılad Karımı, Narıman Qurbanov (sporttyq gımnastıka), Eljana Tánıeva (kórkem gımnastıka, 2 ret), nysana kózdeýden komandalyq saıys, qola – Bekarys Sádýaqas, Suńǵat Jubatqan, Asqar Narqulov (dzıýdo), Ádilbek Mýsın (júzý), Beksultan Qaskenov, Áıgerim Tórehanova (ýshý), Mılad Karımı, Eljana Tánıeva, taekvondo, nysana kózdeý, semserlesýden erler quramasy. Jerlesterimiz bul jarysta barlyǵy 20 (2+7+11) júlde oljalap, TOP-20 komandany túıindedi.
