Sýretti túsirgen – Álı Ǵalym
Joba Ile-Alataý memlekettik ulttyq tabıǵı parki aýmaǵyndaǵy Aıýsaı shatqalynda bastaý aldy. Is-sharaǵa Májilis spıkeri, «Amanat» partııasynyń tóraǵasy Erlan Qoshanov, Týrızm jáne sport mınıstri Erbol Myrzabosynov, Almaty qalasynyń ákimi Darhan Satybaldy, Almaty oblysynyń ákimi Marat Sultanǵazıev, depýtattar, Májilis janyndaǵy Qoǵamdyq palata músheleri, «Kaz Alpine Club» belsendileri, týrıstik, ekologııalyq uıymdardyń ókilderi, «Jastar rýhynyń» belsendileri qatysty.
«Búginde týrızm ekonomıkalyq ósimge tyń serpin beretin baǵytqa aınalyp keledi. Týrızm – bul jańa «munaı». Sondyqtan Memleket basshysy osy sektordy damytý qajet ekenin únemi aıtyp keledi. Prezıdent júrgizip jatqan ishki jáne syrtqy syndarly saıasat arqyly elimizde beıbitshilik pen turaqtylyq, kórshiles memlekettermen dostyq qarym-qatynas ornady. Nátıjesinde, sheteldik týrıster halqymyzdyń qonaqjaılylyǵyn jaqsy biledi jáne Qazaqstanǵa erekshe yqylaspen keledi. Búgingi «Alataý amanaty» jobasy otandyq týrızmdi damytý baǵytynda jasalǵan taǵy bir mańyzdy ári júıeli qadam ekenine senimdimin», dedi E.Qoshanov.
«Alataý amanaty» jobasy Sharyn shatqalynan bastap, Tamǵaly-tas arheologııalyq keshenine deıingi 1 200 shaqyrymnan astam qashyqtyqty alyp jatatyn uzyn-sonar ulttyq soqpaq salýdy kózdeıdi. Baǵyt boıynda 270 myńnan asa turǵyny bar 24 ınfraqurylym nysany men 20 eldi meken ornalasqan. Týrıster etnoaýyldarǵa, glempıngterge, kempıngterge, vızıt-ortalyqtarǵa, qutqarý stansalaryna, sondaı-aq gastronomııalyq jáne etnomádenı týrızm oryndaryna bara alady. Bolashaqta munda shytyrman oqıǵaǵa toly ishki jáne halyqaralyq týrızmge arnalǵan tutas ekojúıe paıda bolady. «Alataý amanaty» jobasy týrızm salasyn damytýdy ǵana emes, aýyl turǵyndarynyń ekonomıkalyq belsendiligin arttyrýdy kózdeıdi.
Soqpaq boıyndaǵy negizgi aıaldamalar qazirdiń ózinde týrıstik tartymdylyǵy bar oryndarǵa aınalyp jatyr. Osyndaı nysandardyń qatarynda «Esik» memlekettik tarıhı-mádenı mýzeı-qoryǵy, Kók Jaılaý shatqaly, Býtakov shatqaly, Alma-Arasan ystyq bulaqtary, Úlken Almaty kóli, VIII-XIII ǵasyrlardaǵy Talhız qalashyǵy, sondaı-aq «Oi-Qaragai» taý kýrorty bar.
Joba iske qosylǵan kúni qatysýshylar «Taza Qazaqstan» jalpyulttyq aksııasy aıasynda taýda qoqys jınap, ploggıng – ekologııalyq is-shara ótkizdi.
«Alataý amanaty» jobasyn bir jarym jylda júzege asyrý kózdelgen. Májilistegi «Amanat» partııasy fraksııasy sarapshylarmen birlesip, jobaǵa zańnamalyq qoldaý kórsetedi. Týrıstik soqpaqtardy quqyqtyq turǵyda retteıtin baza qurylady, sondaı-aq olardy jobalaý men abattandyrýdyń biryńǵaı erejeleri ázirlenedi. Bolashaqta shytyrman oqıǵaǵa toly týrızmdi damytýdyń osy tásilin el aýmaǵynda keńinen qoldaný josparlanyp otyr.
