Foto: senate.parlam.kz
Jınaqta bilim berýdegi ınklıýzııa, azamattardyń ekonomıkalyq jáne saıası quqyqtary men múmkindikterin qamtamasyz etýdegi genderlik tepe-teńdik, jasyl energetıkany damytý, eńbek kóshi-qony, óńdeýshi ónerkásipti damytý, zań shyǵarýdaǵy AI jáne Ortalyq Azııadaǵy ornyqty damý máselelerin qozǵaıtyn jeti baǵyt boıynsha zertteýler daıyndaǵan 14 toptyń jumysy bar.
Senat tóraǵasy Máýlen Áshimbaev osydan buryn jınaqtyń tusaýkeseri barysynda elimizdiń zııatkerlik áleýetin odan ári nyǵaıtý boıynsha Senat júrgizip jatqan jumystyń mańyzdylyǵyn atap ótken edi.
«Osy jınaqtan keıin «Taldaý mektebiniń» tórtinshi legine qatysýshylar ózderin tek túlekter retinde emes, sonymen qatar sheshim qabyldaıtyn azamattarǵa jáne el damýynyń ózekti máselelerine qyzyǵýshylyq tanytatyn keń aýdıtorııaǵa qoljetimdi tolyqqandy taldamalyq basylymnyń avtorlary dep ataı alady. Senat janyndaǵy Sarapshylar klýby men «Taldaý mektebi» – elimizdiń zııatkerlik áleýetin qalyptastyryp, nyǵaıtýǵa qosqan bizdiń úlesimiz. Osyndaı bastamalar arqyly Prezıdent Qasym-Jomart Toqaev jarııalaǵan «Adal azamat» tujyrymdamasynyń negizgi qundylyqtaryn dáripteımiz. Olar – bilim, azamattyq ósý, patrıotızm jáne qoǵam múddesine qyzmet etýge daıyn bolý», dedi M.Áshimbaev.
Jınaq Parlament depýtattaryna, salalyq memlekettik organdarǵa, taldaý ortalyqtaryna, ýnıversıtetterge jiberiledi.
