Týrızm jáne sport mınıstrligine qarasty Oıyn bıznesi jáne lotereıany retteý komıtetiniń tóraǵasy Ádilet Turǵanbaevtyń aıtýynsha, BEJ iske qosylǵannan keıin tek resmı túrde tirkelgen býkmekerlik keńseler men kazınolardyń saıttaryna ruqsat berilip, qalǵandary avtomatty túrde buǵattalady.
«Biz zańdy býkmekerler men kazınolardan basqa barlyq saıttardy buǵattaımyz. Tek olar ǵana «aq tizimge» enedi. Qalǵandarynyń bári avtomatty túrde buǵattalady. Júıe saıttardyń mazmunyn, kiltsózderin, trafıgin taldaıdy, skrınshottar jasaıdy, beınejazba júrgizedi jáne dálel bazasyn jınaıdy. Qazir biz jylyna 20 myń zańsyz oıyn saıtyn buǵattaımyz, al BEJ iske qosylǵannan keıin bul kórsetkish kúnine myń saıtqa deıin jetýi múmkin», dedi ol.
Ádilet Turǵanbaevtyń aıtýynsha, mundaı kólemde jáne jyldam buǵattaý sharalary kóleńkeli oıyn bıznesin júrgizýdi paıdasyz etedi.
«Biz olardyń qazaqstandyq naryqta bolýyn ekonomıkalyq turǵydan tıimsiz etemiz. Olar shydamaı, nátıjesinde naryqtan ketýge májbúr bolady», dedi Komıtet tóraǵasy.
Bas prokýratýra ókili Maqsat Oraqbaev óz sózinde zańdy oıyn bıznesiniń ózinde salyqtan jaltarý derekteri baryn eske saldy.
«Almatydaǵy úsh býkmekerlik keńseniń aınalymy 400 mıllıard teńgeni qurady. Al jaltarý somasy — 113 mıllıard. Bul aqshaǵa 25 mektep nemese 25 aýrýhana salýǵa bolady», dedi M.Oraqbaev.
Oraqbaevtyń aıtýynsha, BEJ zańdy bıznes ókilderi úshin qosymsha kedergi emes, kerisinshe – salyq pen esep júrgizýdi jeńildetetin, tekseristerdi azaıtatyn qural. Sebebi barlyq operasııalar men málimetter avtomatty túrde memlekettik baqylaý júıesine túsip otyrady.
QR Qarjylyq monıtorıng agenttiginiń Prevensııa basqarmasy basshysynyń orynbasary Dáýren Múlikov býkmekerlik keńselerdiń keı jaǵdaılarda qylmystyq jolmen alynǵan qarajatty zańdastyrý quralyna aınalyp otyrǵanyn jetkizdi.
«Esirtki satýshylar óz kiristerin býkmekerlik keńseler arqyly zańdastyrady. Mysaly, Qaraǵandy oblysynda A. degen azamat býkmekerlik keńseler arqyly esirtki satýdan túsken tabysty zańdastyrǵan. Sondaı-aq, biz Telegram-kanaldarda esirtki úshin býkmekerlik keńselerdiń shottaryna qarajat aýdarý arqyly tóleý usynylǵanyn anyqtadyq», dedi D.Múlikov.
BEJ engizilgennen keıin mundaı zańsyz shemalarǵa tosqaýyl qoıylady. Júıe oıynshylardyń kirisi men shyǵysyn salystyryp, sáıkessizdikterdi avtomatty túrde tirkeıdi.
Spıkerlerdiń pikirinshe, BEJ oıyn bıznesindegi jaǵdaıdy túbegeıli ózgertedi: zańdy kompanııalar aıqyn ári ádil erejeler boıynsha jumys istep, tutynýshylardyń quqyqtary qorǵalady, al zańsyz operatorlar júıeden tolyqtaı shettetiledi.
