Foto: kz.qaj.kz
Premer-mınıstr elimizde jol máselesi áli de ózekti ekenin atap ótti.
«Bıyldyń ózinde biz respýblıka boıynsha 13 myń shaqyrym joldy jóndeýden jáne rekonstrýksııadan ótkizemiz. Ol óte aýqymdy jumys. Jańa joldar da salynyp jatyr, mysaly, «Aqtóbe-Ulǵaısyn», «Jezqazǵan-Qaraǵandy», «Jezqazǵan-Petropavl» jáne taǵy basqalar. Jaqynda ózderińiz biletindeı, Memleket basshysy ortalyqtan batysqa qaraı úlken avtojol dálizin salý týraly tapsyrma berdi. Biz osydan týra bir aı buryn jumystardy, ıaǵnı Astana qalasynan Yrǵyzǵa qaraı joldy salýdy bastadyq. Bul jol Torǵaı óńiriniń, ásirese Arqalyq qalasynyń damýyna óte úlken serpin beretin joba. О́ıtkeni, osy jol da, Jezqazǵannan Petropavlǵa baratyn jol da Arqalyq qalasy arqyly ótedi. Bul bıznestiń damýyna, osy óńirlerdegi turǵyndardyń ómir sapasynyń artýyna úlken múmkindik beredi. Sondyqtan biz árıne bul jumystardy jalǵastyra beremiz», dedi Premer-mınıstr.
Sondaı-aq Oljas Abaıuly Qazaqstan joldary Eýropa elderimen salystyrǵanda nelikten kemshin túsip otyrǵanyn aıtty.
«Qazaqstannyń jeri keń baıtaq bolǵandyqtan joldyń ózin salý úshin qomaqty qarjy, myqty ınvestısııa kerek. Mysaly Eýropalyq elderdi alsaq, olardyń jer aýmaqtary sonshalyqty úlken emes, sondyqtan da onda ınfraqurylymdarǵa da kóp qomaqty qarjy jumsalmaıdy. Al bizge bul jaǵdaıda iri ınvestısııalar qajet. Sonda da bolsa, biz bul jumystardy toqtatpaı, kezek-kezeńimen iske asyratyn bolamyz», dedi ol.
