Búgingi tańda atalǵan nysandardyń tek ǵımarat qańqasy ǵana turǵyzylǵan. 2,3 mlrd teńge kóleminde qarjy jumsalǵanymen, qurylys sapasyna baılanysty qabyrǵalarda jaryqtar paıda bolyp, nysandar apattyq dep tanylǵan. Osyǵan oraı jergilikti ákimdik qurylys jumystaryn ýaqytsha toqtatýǵa májbúr bolǵan.
Kezdesý barysynda turǵyndar men jergilikti bılik ókilderi bul turǵyn úılerdiń aıaqtalýy baspana kezeginde turǵan azamattar úshin asa mańyzdy ekenin jetkizdi. Qazirgi tańda ishki árleý, ınjenerlik júıelerdi tartý jáne aýmaqty abattandyrý jumystary júrgizilmegen.
Erbolat Saýryqov bul máseleniń áleýmettik mańyzyn atap ótip, ony jaýapty memlekettik organdarmen birlese qarap, sheshý joldaryn qarastyrý qajettigin aıtty. Sonymen qatar ol nysanǵa qatysty naqty qorytyndy shyǵarý úshin qurylys salasyndaǵy mamandandyrylǵan uıym «QazQSǴZI» AQ-nan (Qazaqstan qurylys ǵylymı-zertteý jáne jobalaý ınstıtýty) arnaıy sarapshylar shaqyrýdy usyndy.
«Bul úılerdiń taǵdyry tek Isataı aýdanynyń turǵyndary úshin ǵana emes, jalpy óńirlik damýǵa tikeleı áser etetin mańyzdy másele. Jaǵdaıdy muqııat zerttep, naqty sheshim qabyldaý qajet», dedi depýtat.
Májilis depýtaty nysannyń ári qaraıǵy taǵdyry jiti baqylaýda bolatynyn, kerek bolsa depýtattyq saýal joldaıtynyn aıtty.
