Elimizdiń usynysymen Eýrazııalyq ekonomıkalyq komıssııa (EEK) aýyl sharýashylyǵy ónimderin óńdeýdi damytýǵa baǵyttalǵan memlekettik qoldaýǵa taldaý júrgizdi. Saýda jáne ıntegrasııa mınıstrliginiń málimetinshe, qujat EAEO-ǵa múshe memleketterdiń, baqylaýshy elderdiń jáne birqatar shet memleketterdiń agroóńdeýdi yntalandyrý tájirıbesin qamtıdy. Sholýda EAEO elderinde ulttyq agrarlyq saıasat aıasynda tıimdi qoldaý sharalaryn qalyptastyrýda paıdaly halyqaralyq tájirıbege erekshe nazar aýdarylǵan. Mysaly, Ulybrıtanııada tamaq ónerkásibindegi ınvestısııalyq jobalarǵa tikeleı qoldaý baǵdarlamalary iske asyrylǵan, oǵan jabdyqtar men ınfraqurylymǵa 40%-ǵa deıingi granttar men óńdeýshilerge arnalǵan eksporttyq qarjylandyrý kiredi. Al Germanııa et, sút jáne naýbaıhanalyq ónerkásipterdi salyqtyq jeńildikter, ınvestısııalyq baǵdarlamalar men eksportty ilgeriletý arqyly aýqymdy qoldaıdy. Kanada men AQSh shaǵyn jáne orta bıznesti qoldaý sharalaryn: nesıeleý, jańǵyrtýdy sýbsıdııalaý jáne fermadan dúken sóresine deıin qosylǵan qun tizbekterin qurýdy qoldanady. Qytaı agroónerkásiptik parkter qurýǵa jáne agroóńdeý salasyna ınnovasııalyq tehnologııalardy engizýge, onyń ishinde sıfrlandyrý men óndiristik prosesterdi avtomattandyrý elementterine basymdyq beredi. Malaızııa men Túrkııa eksportqa baǵyttalǵan agroóńdeýdi qoldaý mysaldaryn kórsetip, oraý, sertıfıkattaý jáne logıstıkaǵa arnalǵan sýbsıdııalaý baǵdarlamalaryn engizgen.
Sholýda aýyl sharýashylyǵy ónimderin óńdeý salasyndaǵy elimizdiń tájirıbesi usynylǵan. Atap aıtqanda, aýyl sharýashylyǵy ónimderin óńdeýdi damytý maqsatynda byltyr 2024-2028 jyldarǵa arnalǵan AО́K ónimderin óńdeýdi damytý jónindegi keshendi jospar bekitildi. Josparda:
- óńdeýge tapsyrylǵan aýyl sharýashylyǵy ónimderine sýbsıdııa berý jáne shıkizat eksportyn shekteý arqyly qoljetimdi shıkizatty qamtamasyz etý;
- negizgi jáne aınalym qarajatyn tolyqtyrýǵa arnalǵan nesıeler boıynsha syıaqy mólsherlemesin sýbsıdııalaý jáne jeńildetilgen nesıeler berý arqyly óndiristiń rentabeldigin arttyrý;
- óńdelgen ónimniń eksporttyq áleýetin jańa naryqtardy ashý arqyly arttyrý sekildi sharalar kózdelgen.
Nátıjesinde eldegi aýyl sharýashylyǵy ónimderin óńdeý úlesi 70%-ǵa jetedi dep kútilip otyr. Elimizdiń ekonomıkasy úshin agroazyq-túlik sektorynyń mańyzdylyǵyn eskere otyryp, sholý jobasy taraptarmen tutastaı maquldanyp, onyń negizinde múddeli múshe memleketter úshin EEK kollegııasynyń usynysyna tıisti joba ázirlengen. Qujat EEK-tiń agroónerkásiptik keshen jónindegi konsýltatıvtik komıtetiniń otyrysynda maquldanǵan, endi aǵymdaǵy jyldyń ekinshi jartyjyldyǵynda EEK kollegııasynyń otyrysynda belgilengen tártippen qabyldanatyn bolady.
