Bul – ınjenerlik bilim berýdiń jańa kezeńin aıqyndaıtyn jáne halyqaralyq deńgeıdegi mamandardy otandyq negizde daıarlaýǵa baǵyttalǵan aýqymdy joba. Atalǵan fılıalǵa 2025–2026 oqý jylyna qabyldaý konkýrstyq negizde ótkizilip jatyr. Talapkerler matematıka jáne orys tili pánderinen jazbasha emtıhan tapsyrýda. Emtıhanǵa qatysý úshin Ulttyq biryńǵaı testileý (UBT) sertıfıkaty talap etilmeıdi. Sonymen qatar, bilim alýǵa nıetti talapkerler úshin aqyly negizde oqýǵa túsý múmkindigi de qarastyrylǵan.
Fılıal úsh negizgi bilim berý baǵdarlamasy boıynsha kadrlar daıarlaıdy, olar: munaı-gaz qubyrlary men saqtaý qoımalaryn salý jáne paıdalaný, munaı-gaz tehnologııalary, ken oryndaryn geologııalyq modeldeý.
-Jańa oqý jylyna jalpy sany 100 grant bólindi. Bul – munaı-gaz sektoryna qyzyǵýshylyq tanytqan jastar úshin zor múmkindik, - deıdi UTEBAYEV UNIVERSITY Basqarma tóraǵasy–rektory Gúlzada Shakýlıkova.
Gýbkın ýnıversıtetiniń fılıalyn Atyraýda ashý – munaıly óńirimiz úshin úlken jetistik. Bul – jastarymyzǵa álemdik deńgeıdegi sapaly bilimge qol jetkizýge berilgen naqty múmkindik. Biz osy seriktestik arqyly bolashaq ınjenerler men kásibı mamandardy daıarlaýda jańa beleske qadam basyp otyrmyz. Qabyldaý emtıhandaryn I.M. Gýbkın atyndaǵy ýnıversıtettiń tájirıbeli professor-oqytýshylar quramy júrgizýde.
