Foto: Beıbarys Anýar, kaz.inform.kz
Uıymdastyrýshylardyń málimetinshe, 40 myńnan astam elorda turǵyny men qala qonaǵy eldiń túkpir-túkpirinen ákelingen 30 tonnadan astam ulttyq sýsynnan dám tatqan. Festıvalde baq synaǵan qymyz óndirýshilerdiń árqaısysy 500 lıtrden astam qymyz ákelip, etno-mádenı jobaǵa qonaqtaryna ulttyq sýsyndy daıyndaýdyń biregeı tehnologııasymen de tanystyrdy. El arasynda dańqy jaıylǵan gastrofestıvalde Sarjal aýylynyń «Janys» sharýa qojalyǵyna bas báıgeni enshilep, 20 mıllıon (20 000 000) teńge syıaqyǵa ıe boldy. Al ekinshi oryndy Qarqaralynyń «Qarynshı» sharýaqojalyǵy ıelense, úshinshi oryndy «Qymyzynaı» qymyzy utyp aldy.
Abaı oblysynyń ákimi Berik Ýálı Sarjal aýylyn aıtýly jeńisimen quttyqtap, yqylas-tilegin bildirdi.
«Bul – óńirimiz úshin úlken mártebe ári ádiletti jeńis! Sebebi Sarjaldyń sary qymyzy – kópten beri el aýzynda júrgen, talaı jurttyń tańdaıyn qaqtyrǵan tabıǵı ónim. Biraq búgingi jeńis tek dám arqyly emes, ádil de ashyq daýys berý nátıjesinde anyqtaldy. Demek bul – halyqtyń ózi bergen ádil baǵa!», deıdi aımaq ákimi.
Sonymen qatar oblys basshysy bul jeńistiń alda ishki týrızmdi damytyp, ulttyq ónimderdi óńirlik brend retinde tanylýǵa jańa serpin beredi degen oıda.
«BaiQymyz» jobasynyń maqsaty – qymyz ishý mádenıetin jańǵyrtýǵa, fermerlikti, aýyl sharýashylyǵyn damytýǵa jáne jergilikti brendterdi tanymal etýge baǵyttaý. Jıynǵa kelýshiler qymyzdan dám tatyp qoımaı, folklorlyq ónerdi tamashalap, qolóner jármeńkesin aralap, konsertter men jylqy kórmesine qatysty. Al Uly Abaıdyń 180 jyldyǵynda sarjaldyqtardyń jeńisi qýanyshty eseleı tústi. Osy tusta Sarjal qymyzy tanymal saýda belgisine aınalyp, álemdik brend bolýǵa tıis.
Abaı oblysy
