Foto: Ashyq derekkóz
Svetlana Jaqypovanyń aıtýynsha, ishki eńbek utqyrlyǵy baǵytynda da iskerlik belsendilik artyp keledi. Máselen, 2022 jyldan beri erikti qonys aýdarý baǵdarlamasy aıasynda 28 myńǵa jýyq azamat el ishinde qonys aýdarǵan. Bul óz kezeginde qonys aýdarýshy óńirlerdegi teris kóshi-qon saldosyn tórt esege azaıtýǵa múmkindik bergen.
«Aǵymdaǵy kezeńde qonys aýdarýshylar men qandastardy beıimdeý jáne ıntegrasııalaý boıynsha qabyldanǵan sharalar olardyń soltústik óńirlerden nóldik mánge ketý deńgeıin tómendetýge yqpal etti», dedi mınıstr.
Sondaı-aq, mınıstr 2030 jylǵa deıin kóshi-qon jáne demografııalyq saıasatty damytýǵa arnalǵan jańa strategııalyq qujat ázirlenip jatqanyn jetkizdi.
Qujat aıasynda eńbek kóshi-qonyn basqarýdyń sıfrlyq tetikteri iske qosylady. Bul úshin Qazaqstanda Eńbek kóshi-qony boıynsha biryńǵaı sıfrlyq platforma engizilmek. Platforma arqyly bilikti mıgranttardy irikteý, tirkeý jáne beıimdeý úderisteri avtomattandyrylady.
Jańa qujatta:
- Zańsyz jumyspen qamtý men kóleńkeli ekonomıkaǵa qarsy sharalardy kúsheıtý;
- Sheteldik jumys kúshiniń eńbek quqyqtaryn qorǵaý;
- Tapshy salalar boıynsha kvota júıesin qaıta qaraý;
- Uıymdastyrylǵan kóshi-qon arnalarynyń aıasyn keńeıtý qarastyrylady.
Ishki eńbek kóshi-qonyn jandandyrý úshin keshendi tásil engiziledi. Aldymen qajetti ınfraqurylym qurylyp, sodan keıin ǵana turǵyndardy kóshirý júzege asyrylady. Sonymen qatar, jumyspen qamtý ortalyqtary arqyly jumys kúshi tapshylyǵy bar óńirlerge tartý maqsatynda jańa motıvasııalyq quraldar engizý josparlanǵan.
