Ekspedısııaǵa qatysýshylar jolaı Amankeldi aýdanynna qarasty Tasty aýylynyń mańyndaǵy Keıki Kókembaıulynyń kesenesine aıaldap, batyrdyń rýhyna duǵa baǵyshtady.
Odan ári Amankeldi kentindegi A. Imanov atyndaǵy memorıaldyq mýzeıge soqty. Úrpek aýylyna baryp, álemge áıgili Torǵaı geoglıfteriniń tylsym syryna úńildi.
Ekspedısııa músheleriniń aıtýynsha, sapardyń basty maqsaty – Mirjaqyp Dýlatulynyń kindik qany tamǵan Qyzbel óńirindegi Asqar kúzdigine, alash ardaqtysynyń Bıdaıyqtaǵy kesenesine baryp zııarat etý.
«Biz bul sapardy kópten kútip júrgen edik. Jospar qurylǵan kúnnen bastap júrekte bir tolqý, erekshe tebirenis boldy. О́ıtkeni, bul — kıeli Torǵaıdyń tereń tarıhyna taǵzym jasaý, ult zııalylarynyń izi qalǵan qasıetti mekenmen syrlasý bolatyn», deıdi «Dala ólkesi tarıhy» mýzeıiniń basshysy Raýan Terek.
Taǵylymdy saparǵa jergilikti kásipker Erden Sosıaluly, Arqalyq qazaq jasóspirimder teatrynyń basshysy Nurlybek Sapabekuly sııaqty azamattar demeýshilik jasaǵan.
Ekspedısııa endi Torǵaıǵa baryp toqtap, Ybyraı Altynsarın, Nurhan Ahmetbekov, Shaqshaq Jánibek, Álibı Jankeldın, Ahmet Baıtursynuly men Mirjaqyp Dýlatuly syndy zańǵar tulǵalardyń mýzeılerin aralaıdy.
Qostanaı oblysy
