Búginde Qazaqstanda 270-ten astam mýzeı jumys isteıdi. Olar elimizdiń tarıhı-mádenı murasyn saqtap, jurtshylyqqa tanystyratyn mańyzdy ortalyq sanalady. 2025 jyldyń alǵashqy jartyjyldyǵynda mýzeıler 817 is-shara ótkizdi. Onyń ishinde:
- 28 halyqaralyq joba,
- 154 respýblıkalyq deńgeıdegi is-shara,
- 45 bilim berý semınary.
Mýzeıler túrli dóńgelek ústelder, konferensııalar, sheberlik sabaqtary men dárister ótkizetin alańǵa aınalyp, kásibı biliktilikti arttyrý men jańa aýdıtorııany tartýǵa baǵyttalady.
Osy saladaǵy basty oqıǵalardyń biri – eki jetekshi mekemege «Ulttyq mýzeı» mártebesi berildi. Bul ataqqa QR Ábilhan Qasteev atyndaǵy Memlekettik óner mýzeıi men QR Ortalyq memlekettik mýzeıi ıe boldy.
Sonymen qatar, Astanada ótken Qazaqstan mýzeıleriniń III Kongresi mádenı murany saqtaý, qalpyna keltirý jáne sıfrlandyrý máselelerin talqylaıtyn mańyzdy pikirtalas alańyna aınaldy.
Qazaqstandyq mýzeıler iri mádenı bastamalardy uıymdastyrýshy ári qatysýshy retinde belsendi jumys júrgizýde. Atap aıtsaq, Á.Qasteev mýzeıinde «Turan taýlary» atty halyqaralyq kórme-sımpozıým ótti. QR Ulttyq mýzeıi «Ulttyq qundylyqtar: salttyń syrly beınesi» atty respýblıkalyq baıqaý uıymdastyrdy. «Mádenı dıalog: Qazaqstan – Reseı» atty halyqaralyq dóńgelek ústel gýmanıtarlyq baılanysty nyǵaıtý alańyna aınaldy. TÚRKSOI uıymymen yntymaqtastyq aıasynda Almatyda «Uly Dalanyń ulttyq dástúrleri» atty III Halyqaralyq ǵylymı forým ótti.
2025 jyly Qytaı ónerine erekshe nazar aýdaryldy. QR Ulttyq mýzeıinde «Qytaı óneriniń oı-maqsattary» atty Qytaı ulttyq óner mýzeıiniń jaýharlary qoıylǵan kórme uıymdastyrylyp, «Jibek jáne Jibek joly: Qytaıdan Qazaqstanǵa» atty Qytaı týrızm jyly aıasyndaǵy joba ótti.
Mádenıet salasyndaǵy taǵy bir jetistik – Qazaqstan Prezıdenti Qasym-Jomart Toqaevtyń Qytaıǵa sapary aıasynda júzege asqan Beıjińdegi Qazaqstannyń Mádenıet ortalyǵynyń resmı ashylýy. Ortalyq 2025 jylǵy maýsymda tirkelip, Qazaqstannyń sheteldegi alǵashqy mádenı ókildigine aınaldy.
Ortalyqta kitaphana, kórme jáne konferens-zaldar, shyǵarmashylyq, qolóner jáne qazaq tilin úırenýge arnalǵan úıirmeler bar. Ortalyq Qytaı aýdıtorııasyna arnalǵan kórmeler, konsertter, fılm kórsetilimderi, festıvalder men dárister ótetin mádenı dıalog alańyna aınalmaq.
Mınıstrlik Astanada Qytaıdyń Mádenıet ortalyǵyn ashý máselesin de qarastyryp jatyr. Bul ózara mádenı almasýdyń jáne strategııalyq seriktestikti nyǵaıtýǵa sep bolary anyq.
2025 jyldyń alǵashqy jartyjyldyǵy Qazaqstan mádenıetiniń el ishinde de, halyqaralyq deńgeıde de qarqyndy damyp kele jatqanyn kórsetti. Halyqaralyq áriptestik keńeıip, mýzeı tájirıbeleri jańaryp, mádenı dıplomatııa syrtqy saıasattyń mańyzdy quralyna aınalyp jatyr.
