Eger balanyń damýyna qatysty erekshelikter anyqtalsa, ol erte aralasý ortalyǵyna joldanady. Bul ortalyqta patronajdyq baqylaý júrgiziledi, bala men onyń otbasyna tamaqtaný, damý boıynsha mamandardyń keńesteri, telemedısına jáne vedomstvoaralyq qoldaý kórsetiledi. Júıege mektep medısınasy, kásibı tekserý jáne vaksınasııalaý kabınetteri de endirilgen. Basymdyq – balany úzdiksiz qadaǵalaý ári búkil otbasyǵa keshendi kómek kórsetý.
Jańa model tek qurylymmen shektelmeı, qabyldaý men qyzmet kórsetýdi uıymdastyrýdyń logıkasyna da ózgeris ákeldi.
Birinshi – meıirgerlik qabyldaý. Endi keıbir medısınalyq qyzmetterdi dáriger emes, arnaıy oqytylǵan meıirgerler júrgizedi. Bul dárigerlerdiń júktemesin jeńildetip, kúrdeli klınıkalyq jaǵdaılarǵa nazar aýdarýyna múmkindik berip otyr. Sonyń nátıjesinde, dınamıkalyq baqylaýǵa alynǵan naýqastardyń úlesi 30%-dan 38%-ǵa deıin ósti. Bul – sozylmaly syrqattardy baqylaýda júıeliliktiń artqanyn bildiredi.
Ekinshi – josparly qabyldaý formaty. Halyqqa aldyn ala belgilengen ýaqytta qabyldaýǵa jazylý múmkindigi usynyldy. Ásirese, sozylmaly derti bar naýqastar úshin bul tásil tıimdi. Jańa format shuǵyl júginýler sanyn azaıtyp, emdeýge jatqyzý kórsetkishin tómendetýge sep boldy. Sonymen qatar, bastapqy býyn dárigerlerine degen senim arta tústi.
Úshinshi – ózin-ózi jazý fýnksııasy. Endi dınamıkalyq baqylaýda turǵan pasıentter beıindi mamanǵa ózdiginen jazyla alady. Bul tirkeýshi men ýchaskelik dárigerge táýeldilikti joıyp, qyzmet alýdy ońtaılandyrdy.
Dıagnostıkalyq qyzmetterdiń jaramdylyq merzimi burynǵy 10 kúnnen 1–3 aıǵa deıin uzartyldy. Bul qajettilikti negizdemesten qaıta-qaıta tekserilý jaǵdaılaryn azaıtýǵa múmkindik berdi. Budan bólek, dıagnostıkalyq qyzmet túrleriniń sany 507-den 344-ke deıin qysqartyldy. Endi olar naqty klınıkalyq kórsetkishter men negizder boıynsha ǵana taǵaıyndalady. Bul bastama zerthanalar men dıagnostıkalyq bólimshelerdiń artyq júktemesin azaıtyp, taǵaıyndaý dáldigin arttyrýǵa sep.
Medısınalyq ońaltýdyń úshinshi kezeńine jatatyn qyzmetter tizbesi de qaıta qaraldy – buryn 97 qyzmet túri bolsa, qazirgi tańda bul san 26-ǵa deıin qysqartylǵan.
