Elde qazir halyq sany 20 mıllıonnan asady. Halyqtyń shamamen 38%-y aýylda turady. Olarǵa uzyn-sany 677 bastapqy densaýlyq saqtaý nysany kómek kórsetedi. Nysandardyń 62%-y qalalarda, 38%-y aýyldyq jerlerde ornalasqan. Memlekettik uıymdar bekitilgen halyqtyń 75 paıyzyna, ıaǵnı 15 mln-ǵa jýyq adamǵa, al jekemenshik uıymdar 25%-ǵa, naqtylasaq 5 mln-ǵa jýyq adamǵa qyzmet kórsetedi. Ýchaskeler qurylymynyń 80 paıyzyn jalpy praktıka dárigerleri, 13 paıyzyn pedıatrııalyq ýchaskeler, 6 paıyzyn terapevtik ýchaskeler quraıdy. Jýyrda ótken baspasóz máslıhatynda «Respýblıkalyq medısınalyq-sanıtarııalyq alǵashqy kómek ortalyǵy» dırektory Aıgúl Qasymova Densaýlyq saqtaý mınıstrliginiń normatıvtik-quqyqtyq bazany jetildirý boıynsha júıeli jumys júrgizip jatqanyn atap ótti.
«Bastapqy densaýlyq saqtaýdyń negizgi normatıvtik qujattarynyń biri №49 alǵashqy medısınalyq-sanıtarlyq kómek kórsetý standarty sanalady. Jańa ózgeristerge saı qazir densaýlyq saqtaý dárigeriniń qabyldaý uzaqtyǵyn ulǵaıtý usynyldy. Iаǵnı, eger buryn áriptester pasıentterdi 4-5 saǵat qabyldasa, qazir bul ýaqyt 6 saǵatqa deıin sozylady. Bul pasıentterdi muqııat tekserýge, tıimdi em taǵaıyndaýǵa, dınamıkalyq baqylaýdy sapaly júrgizýge, sondaı-aq bastapqy densaýlyq saqtaýdyń mańyzdy baǵyttaryn – aýrýlardyń aldyn alý men erte anyqtaýǵa múmkindik beredi», dedi Aıgúl Qasymova.
Saladaǵy keıingi ózgeristerge sáıkes, pasıentterdi meıirgerler de qabyldaı beredi. Beıindi mamandarǵa ózin-ózi jazý múmkindigi iske qosylady. Pasıentterdi kezek boıynsha emes, keste boıynsha qabyldaý josparlanypty. Ásirese, josparly gospıtaldaý aldyndaǵy konsýltasııalyq-dıagnostıkalyq qyzmetter ońtaılandyrylǵan. Mobıldi brıgadalardyń róli keńeıip, MSAK uıymdarynda shuǵyl kómek kabınetteri ashylyp jatyr. Sondaı-aq bıyl dıagnostıkalyq ádisterdi jańartý jáne maqsatty toptardy keńeıtý arqyly aýrýlardy erte anyqtaýǵa jáne aldyn alýdy jaqsartýǵa baǵyttalǵan skrınıngtik baǵdarlamalardy jetildirý jumystary jalǵasyp jatyr. Munyń barlyǵy túptep kelgende alǵashqy medısınalyq-sanıtarlyq kómek júıesin jetildirýge septigin tıgizedi.
