Sýret: instagram @turkistan_oblysy
Sý vedomstvosynyń basshysy Qazaqstan men О́zbekstan arasyndaǵy transshekaralyq sýdy bóletin «Dostyq» memleketaralyq kanalyna bardy. Qazir sý bizdiń elge buryn qol jetkizilgen halyqaralyq kelisimderge sáıkes jetkizilip, Jetisaı jáne Maqtaaral aýdandaryndaǵy egis alańdaryn sýarýǵa paıdalanylady.
Búginde «Qazsýshardyń» Túrkistandaǵy fılıaly Maqtaaral aýdanynyń sharýalarymen sýarmaly sý berýge 3 223 kelisimshart jasasty, Jetisaı aýdany boıynsha 1 492 kelisimshart jasaldy. Qazir Jetisaı aýdanynda sýarmaly jer kólemi 47 332 ga, Maqtaaral aýdanynda 27 255 ga.
Odan keıin mınıstr «Mashınalyq ádispen sý kóterý kanalynyń» jumysymen tanysty. «Qazsýshardyń» Túrkistandaǵy fılıaly nysandy mehanıkalyq jolmen tazalaýdy aıaqtap qaldy.
«Kelisimshart jasaǵan sý paıdalanýshylarmen mindettemelerdi oryndaý úshin kanaldar boıynsha kezekpen sý berý júrgiziledi, al mınıstrliktiń jumys toby men Aral-Syrdarııa basseındik ınspeksııasy sý paıdalanýdyń zańdylyǵyn qatań baqylaýda ustaıdy. Sondaı-aq sýdy kelisimshartsyz tutynǵandarǵa jáne sý jetkizýshiniń kelisiminsiz ósiriletin daqyldardyń túrin ózgertkenderge aıyppul qarastyrylǵan. Biraq dıqandar da sý únemdeý tehnologııalaryna kóship, ylǵaldy kóp qajet etetin daqyldardy egýdi azaıtý arqyly sý resýrstaryn únemdeýge óz úlesterin qosýy kerek. Memleket buǵan sýbsıdııalar túrinde barlyq qajetti jaǵdaıdy jasady», dedi Sý resýrstary jáne ırrıgasııa mınıstri Nurjan Nurjigitov.
Bıyl Túrkistan oblysynda kúrish egý jospary 3,3 eseden asyp ketkenin eske sala keteıik. Sýarmaly sý tapshylyǵy qaýpimen 4000 ga shekti kólemge qaramastan, «Qazsýshardyń» jergilikti fılıaly dıqandarmen 13 258 ga kúrish alqaptaryn sýarýǵa 1 047 kelisimshart jasasqan. Osyǵan baılanysty fılıaldyń birqatar basshysyna qatań sógis berildi.
Buǵan deıin Sý resýrstary jáne ırrıgasııa mınıstrligi Qazaqstannyń ońtústiginde sýarý kezeńiniń turaqty ótýin qamtamasyz etý úshin arnaıy jumys toptaryn qurǵan bolatyn. Bul toptar jergilikti atqarýshy organdarmen birlesip táýlik boıy kezekshilik júrgizedi. Túrkistan oblysyndaǵy vegetasııalyq kezeń mınıstrliktiń baqylaýynda.
