Baıqaýdy uıymdastyrýshy – osy óńirdiń týmasy, mádenıet qaıratkeri, Qaraǵandydaǵy Q.Baıjanov atyndaǵy konserttik birlestiktiń «Arqa sazy» folklorlyq ansambliniń kórkemdik jetekshisi Baıǵara Hamzeuly. Ol osyǵan deıin Erden Sandybaıuly atyndaǵy dástúrli respýblıkalyq qylqobyzshylar baıqaýyn ótkizip kelgen. Bıyl Qoılybaı áýlıe atyndaǵy qobyzshylar baıqaýyn qolǵa aldy.
Baıqaýǵa elimizdiń, Jetisý, Ulytaý oblystary, Almaty, Astana, Qaraǵandy, Taldyqorǵan qalalarynan kelgen on eki ónerpaz qatysty.
Qurmanǵazy atyndaǵy qazaq ulttyq konservatorııasynyń professory, Qazaqstannyń eńbek sińirgen qaıratkeri, qobyzshy Bazarhan Qosbasarov tóraǵa bolǵan qazylar alqasynyń quramynda ónerdiń jiligin shaǵyp, maıyn ishken maıtalmandar boldy. Qurmanǵazy atyndaǵy Ulttyq konservatorııanyń professory, Qazaqstannyń eńbek sińirgen qaıratkeri, kúıshi Ermurat Úsenov qatarly taǵy basqa qobyzshylar úmitkerlerdiń sheberligin synady.
Qatysýshylardyń bári kásibı qobyzshylar. Biri magıstrant, biri ustaz, biri ansamblde oınaıdy. Olar «Qorqyt» kúıin oryndady.
Qoılybaı áýlıe atyndaǵy qaıyrymdylyq qory, Aqsaqaldar qaýymdastyǵynyń tóraǵasy Abýlaıs Túsipbekulynyń aıtýynsha, «aty ańyzǵa aınalǵan áýlıe babamyz amanaty boıynsha Ulytaý óńirindegi Dýlyǵaly ózeniniń boıynda jerlengen. 1994 jáne 2023 jyldary áýlıeniń arýaǵyna baǵyshtalyp, as berildi. Qoılybaı áýlıeniń basyna kelimdi-ketimdi kisiler toqtaıtyn bes bólmeli «Taǵzym úıi» salyndy. 2024 jyldyń tamyz aıynan bastap burynǵy keseneniń ornyna záýlim kesene salynyp jatyr. Joshy han, Dombaýyl, Alashahan sııaqty Qoılybaı áýlıeniń basyna týrıstik oryn jasaýǵa bolady», dep oryndy usynys aıtty.
Jerebe boıynsha shyqqan ár qobyzshy tórt shyǵarmadan oryndady. Alǵashqysy arnaıy baıqaýǵa jazylǵan Á.Ábdinurovtyń «Dýlyǵaly ózen», E.Úsenovtiń «Qoılybaı áýlıe» kúıleri, úshinshisi óz tańdaýy boıynsha qobyzǵa arnalǵan kúı, tórtinshisi konvertke jasyrǵan shyǵarmany oryndaý. Ultymyzdyń kıeli aspabynyń syrly da, sıqyrly sazy tyńdaýshylardy baýrady.
Bas júlde 1 500 000 teńge aqshalaı syılyqty Ásen Smaıl (Taldyqorǵan qalasy) oljalady. I oryn alǵan Ádilet Azbaev (Almaty qalasy) 1 mln teńge, II oryn alǵan Oljas Qurmanbek (Astana qalasy) 500 000 teńge ıelendi. III oryn alǵan jetisýlyq Erasyl Tórehanov pen qaraǵandylyq Aıaýlym Jetpisbaevaǵa da aqshalaı syılyq buıyrdy.
Ulytaý oblysy
