Kún tártibi qaraldy

Qasym-Jomart Toqaevtyń tóraǵalyq etýimen bolǵan Parlament Senaty bıýrosynyń otyrysynda palatanyń 25 maýsymda bolatyn kezekti jalpy otyrysynyń kún tártibi qaraldy, dep habarlady Senattyń baspasóz qyzmeti. Senatorlar birqatar halyq­ara­lyq qujattardy ratıfıkasııa­laýdy josparlady. Atap aıtqanda, olar Kaspıı teńiziniń túbin Qazaq­stan men Túrikmenstan arasynda bólý týraly kelisimdi, Qazaqstan men Túrikmenstan arasyndaǵy Shekara ókilderiniń (shekara komıssarlarynyń) qyzmeti týraly úkimetaralyq kelisimdi, Qazaqstan men AQSh arasyndaǵy qylmystyq ister boıynsha ózara quqyqtyq kómek týraly shartty, TMD-ǵa qatysýshy memleketterdiń qarýly kúshteri ınjenerlik áskerleriniń gýmanıtarlyq mınasyzdandyrý salasyndaǵy yntymaqtastyǵy týraly kelisimdi, Kaspıı teńiziniń sý bıologııalyq resýrstaryn saqtaý jáne utymdy paıdalaný týraly kelisimdi ratıfıkasııalaý týraly qujattar bolatyn. Depýtattar otyrysta Aza­mat­tyq prosestik kodeksiniń jobasyn jáne zańnamaǵa azamattyq prosestik zańnamany jetildirý máseleleri boıynsha túzetýler engizý týraly ilespe zań jobasyn birinshi oqylymda qaraıdy. Sondaı-aq, birqatar zańnamalyq akti­lerge menshik quqyǵyn qorǵaý­dy kúsheıtý, sharttyq mindet­te­me­lerdi qorǵaýdy kepildendirý jáne olardy buzǵany úshin jaýap­kershilikti qatańdatý máseleleri boıynsha túzetýler engizý týraly zań jobasyn birinshi oqylymda qaraýdy josparlady. Odan basqa, zańnamaǵa maqta salasyn damytý máseleleri boıynsha ózgerister men tolyqtyrýlar engizý týraly (birinshi oqylym) jáne «О́simdikter karantıni týra­ly» zańǵa ózgerister men tolyq­ty­rýlar engizý týraly zań jobalary senatorlardyń qaraýyna usynylady. Bas komıtetterdiń tóraǵalary zań jobalarynyń Senat otyrysyna daıyndyǵy týraly baıandady. Bıýro músheleri Senattyń 2015 jylǵa arnalǵan Negizgi is-sha­ra­larynyń josparyna ózgeristerdi de bekitti. Atap aıtqanda, palata Qazaqstan Respýblıkasynyń Mem­lekettik shekarasyndaǵy «Qorǵas» avtomobıl ótkizý beketinde vete­rınarlyq-sanıtarlyq baqylaý jáne Qorǵas ózenindegi «Dostyq» sý júıesin birlese paıdalaný jó­nindegi máselelerdi talqylaý úshin Agrarlyq máseleler, tabıǵatty paıdalaný jáne aýyldyq aý­maq­tardy damytý komıtetiniń bıylǵy IV toqsanda Almaty oblysyna kósh­peli otyrysyn ótkizýdi jos­parlap otyr. Bıýro otyrysynda Senat Tór­a­ǵasy Q.Toqaev TMD Parla­ment­aralyq Assambleıasy keńesiniń atynan depýtat Eleýsin Saǵyndyqovqa «Parlamenttik yntymaqtastyqty nyǵaıtqany úshin» medalin tabys etti.