Eki aı buryn IBA-nyń dál osyndaı jarys Shrı-Lanka astanasy – Kolomboda uıymdastyrylǵan edi. Sol kezde jańadan taǵaıyndalǵan aǵa jattyqtyrýshy Baqyt Sársekbaev úlken táýekelge bardy. Beıjiń Olımpıadasynyń jeńimpazy buryn-sońdy kózge túspegen esimderi kópshilikke beımálim boksshylardyń basyn qosyp, solarǵa senim artty. О́zderine berilgen múmkindikti jalyndy jastar tamasha paıdalandy. Jarys jolyna shyqqan 12 jigittiń 10-y altyn alsa, bireýi qola medaldy ıelendi. Tek bir ǵana sportshy osy sapardan júldesiz oraldy. Nátıjesinde, elimizdiń quramasy jalpy komandalyq esepte jeke-dara kósh bastady. Osylaısha, Baqyt Ábdirahmanuly óziniń myqty boksshy ǵana emes, bilikti bapker ekenin de moıyndatty.
Aldaǵy kúnderi Taı elinde ótetin jarystyń jóni múldem bólek. О́ıtkeni World Boxing – Halyqaralyq Olımpıada komıteti (HOK) tarapynan moıyndalǵan uıym. Sol sebepti de Qazaqstan boks federasııasynyń (QBF) qoldaýyna ıe bolǵan Baqyt Sársekbaev atalǵan dodaǵa kil myqtylardy aparý múmkindigine ıe boldy.
Bangkokta qazaq eli namysyn myna boksshylar qorǵaıdy: 50 kg – Nurzat Ońǵarov (el birinshiliginiń fınalısi, Ispanııadaǵy jarystyń jeńimpazy, Taılandtaǵy týrnırdiń qola júldegeri), 55 kg – Beksultan Boranbek (jastar arasyndaǵy álem chempıony), 60 kg – Nurıslam Qaldybaev (Azııa chempıony – U22), 65 kg – Ilıa Kalının (el birinshiliginiń qola júldegeri), 70 kg – Nurbek Mursal (jastar arasyndaǵy álem chempıonatynyń kúmis júldegeri, halyqaralyq týrnırlerdiń jeńimpazy), 75 kg – Aman Qonysbekov (Azııa chempıony – U22), 80 kg – Sanjaráli Begalıev (jastar arasyndaǵy álem chempıony), 85 kg – Azatbek Joldashan (Azııa chempıony – U22), 90 kg – Temirlan Muqataev (elimizdiń chempıony), +90 kg – Nurasyl Asylhan (el birinshiliginiń qola júldegeri).
– Azııa chempıonaty qarsańynda Ystyqkólde oqý-jattyǵý jıynyn ótkizdik. Sol kezde ár salmaqtyń myqtylaryn judyryqtastyryp, qazirgi kezde kimder naǵyz babynda ekenin anyqtadyq. Solardyń arasynan iriktelinip alynǵan úzdikter Bangkokta baq synaıdy. Sharshy alańǵa shyǵatyn jigitterdiń barlyǵy da jeńis tuǵyrynyń eń bıik satysyna kóterilýge baryn salady, – deıdi Baqyt Ábdirahmanuly.
Eldos Saıdalın bastaǵan qyzdar komandasy sapynda Gúlnaz Bóribaeva (48 kg), Tomırıs Myrzaqul (51 kg), Elına Bazarova (54 kg), Vıktorııa Baıdýkova (57 kg), Ásem Tańatar (60 kg), Arýjan Jańabaeva (65 kg), Baqyt Seıdish (70 kg), Shuǵyla Nálibaı (75 kg), Ásel Toqtasyn (+80 kg) syndy boksshylar óner kórsetedi.
