Sýret: tolqyn.kz
Úkimet Túrkistan oblysynda sýmen jabdyqtaý jelilerin salýǵa jáne jańǵyrtýǵa Arnaýly memlekettik qordan 20 mlrd-tan astam teńge bóldi.
Qazir óńirde quny 5 mlrd teńge bolatyn Shardara toptyq sý qubyryn salý jumystary júrip jatyr. Qor qarajatynan Jibek joly, Sheńgeldi, Aq úı, Qaratóbe, Jýantóbe, Jańadáýir, Esikqorǵan, Quıǵan, Aqsý aýyldaryndaǵy sýmen jabdyqtaý jobalaryna 4,2 mlrd teńge bólindi.
Aýyldyq eldi mekenderdi aýyzsýmen qamtamasyz etý jumystary Saryaǵash, Qazyǵurt, Keles, Ordabasy men Otyrar aýdandarynda da júrgizilip otyr.
Aıta keteıik, buǵan deıin Saryaǵash aýdanyndaǵy magıstraldy sý qubyryn jańartý jumystaryn aıaqtaý úshin Arnaýly memlekettik qordan 2,5 mlrd teńgeden astam qarajat bólingeni habarlanǵan edi. Bul joba 260 myńnan astam halqy bar 66 aýyldy ortalyqtandyrylǵan sýmen jabdyqtaý júıesine qosýǵa múmkindik beredi.
