Festıval shymyldyǵy elimizde túsirilgen «Shatyrdaǵy ekeý» fılmimen ashyldy. Kartına Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Fılmdi kópshilikke tanystyrý maqsatynda prodıýser Álııa Sháripbaeva arnaıy baryp, shyǵarmashylyq kezdesý ótkizdi. Ol kórermendermen ashyq áńgime quryp, túsirilim barysyndaǵy erekshe sátterdi bólisti.
«Shatyrdaǵy ekeý» – jas rejısser Gúlshat Smaǵulovanyń debıýttik tolyqmetrajdy týyndysy. Fılmde taǵdyry kúrdeli jas jigit Damır men aýtızmge shaldyqqan jasóspirim Kostıa arasyndaǵy dostyq pen ózara túsinistik sýretteledi. Kartına ınklıýzıvti qoǵam qurýdyń mańyzyn, erekshe balalardyń áleýmetpen baılanys ornatýdaǵy qıyndyqtaryn názik ári shynaıy jetkize bilgen.
Festıval aıasynda kórermen nazaryna usynylǵan taǵy bir otandyq týyndy – «Qajymuqan» fılmi. Kartına fransýz kúresinen álem chempıony atanǵan tuńǵysh qazaq balýany Qajymuqan Muńaıtpasovtyń ómir jolyna arnalǵan. Tarıhı tulǵanyń erligi men ulttyq rýhty kóterýdegi róli, halyqaralyq arenalardaǵy jeńisteri men halyq arasyndaǵy orny fılm barysynda keńinen kórinis tapty. Bul týyndy – jastarǵa úlgi bolarlyq, tárbıelik máni zor rýhanı eńbek.
Aıta keteıik, «Karakýz fılm» kınofestıvali dástúrli baıqaý formatynan ózgeshe. Munda úzdikterdi kásibı qazylar alqasy emes, kórermenniń ózi daýys berý arqyly anyqtaıdy. Festıval baǵdarlamasynda alty negizgi nomınasııa qarastyrylǵan: «Úzdik kórkem fılm», «Úzdik derekti fılm», «Úzdik anımasııalyq fılm», «Úzdik qysqametrajdy fılm», «Balalar kózaıymy júldesi» jáne «Karakýz fılm» Gran-prıi. Sonymen qatar, bes arnaıy júlde de tabys etiledi.
