Qazaqstan óńirlik ıntegrasııa baǵytynan aýytqymaıdy

ASTANA. 17 aqpan. Qazaqstan syrtqy ekonomıkalyq baılanystardy jáne óńirlik ıntegrasııany keńeıtý baǵdarynan tanbaıdy. Prezıdent Nursultan Nazarbaev Qazaqstanda tirkelgen sheteldik dıplomatııalyq mıssııalar basshylarymen Aqordada ótken kezdesýde osylaı dedi. Bul týraly «QazAqparat» habarlady. Elbasy óz sózinde 2015 jyldyń 1 qańtarynda Eýrazııalyq ekonomıkalyq odaqty qurý týraly sharty kúshine engenin eske salyp, alǵash ret Eýrazııada rýsýrstyq áleýeti qýatty, kóliktik-energetıkalyq júıesi damyǵan ekonomıkalyq birlestiktiń qurylǵanyn atap ótti. «EAEO negizine egemendikti qurmetteý, ekonomıkalyq pragmatızm, teńdik jáne ashyqtyq ustanymdary negiz qalaǵandyǵyn erekshe atap ótkim keledi. Onsyz birde-bir birlestik tirshilik ete almaıdy», - dedi N.Nazarbaev. Memleket basshysynyń atap ótýinshe, qazirdiń ózinde EAEO-nyń tartymdylyǵy jaıynda jer-jerde aıtylyp, odaqpen erkin saýda aımaǵyn qurýǵa qyzyǵýshylyq tanytqan elderdiń qatary 10-ǵa jetip qalǵan. «Qazaqstannyń Eýropalyq odaqpen seriktestik pen yntymaqtastyqty keńeıtý týraly jańa kelisimshart boıynsha kelissózderdi aıaqtaýy mańyzdy tabys boldy. Aǵymdaǵy jyly biz Qazaqstannyń Dúnıejúizilik saýda uıymyna kiredi dep esepteımiz.  Bul syrtqy saýdanyń ulǵaıa túsýine septigin tıgizedi», - dedi Qazaqstan kóshbasshysy. Sáken Maılybaı.