Premer-mınıstr «Shardara» sý qoımasy men «Kóksaraı» sý rettegish nysanyn baryp kórdi. «Qazgıdromet» RMK-nyń málimetinshe, elimizdiń ońtústik óńirlerindegi bıylǵy vegetasııa maýsymynda jaýyn-shashyn tapshy bolyp tur. Dúnıejúzilik meteorologııalyq uıym men Soltústik Eýrazııalyq klımat ortalyǵynyń boljamdary da gıdrologııalyq qurǵaqshylyqtyń bolýy ábden múmkin deıdi. Osy úderis aýyl sharýashylyǵyna qater týdyryp otyr, ásirese Syrdarııa ózeni basseıni boıynda qurǵaq aýa raıy uzaq ýaqyt saqtalar bolsa, keıbir jerlerde egin qýrap ketýi múmkin.
Sý berýdi ońtaılandyrý týraly ishki sharalarmen qatar, Úkimet Syrdarııa ózeniniń joǵary jaǵynda ornalasqan kórshiles memlekettermen Ortalyq Azııanyń memleketaralyq sý sharýashylyǵyn úılestirý komıssııasy aıasynda kelissózder júrgizip jatyr. Kelisimder sýdy ýaqtyly alýǵa jol ashady.
Shardara sý qoımasynyń jumysymen tanysý kezinde Premer-mınıstrge nysannyń jaǵdaıy men ońtústik óńirlerdegi sýarý jumystary týraly baıandaldy. Bul – Túrkistan men Qyzylorda oblystaryndaǵy aýyl sharýashylyǵy alqaptaryn sýarmaly sýmen, sondaı-aq Shardara qalasynyń turǵyndaryn aýyzsýmen qamtamasyz etetin negizgi sý nysany.
Oljas Bektenov sýdy bólý úderisiniń ashyq bolýy úshin qadaǵalaýdy kúsheıtý qajettigin aıtty.
«Agroónerkásip kesheni – ekonomıkanyń negizgi sektorlarynyń biri. Qazirgi jaǵdaıda sý resýrstaryn qajetine qaraı ári qatań qadaǵalaı otyryp bólý erekshe mańyzǵa ıe. Qadaǵalaýdy barlyq deńgeıde kúsheıtip, sý bólýdi ashyq etý qajet», dedi Premer-mınıstr.
Osy turǵyda Premer-mınıstrdiń orynbasary Qanat Bozymbaevqa kórshiles eldermen sý berý rejimderin kelisý men týyndaǵan máselelerge jedel den qoıý, sonyń ishinde turǵyndardy aýyzsýmen qamtamasyz etý boıynsha jumystardy úılestirý tapsyryldy.
«Kóksaraı» sý rettegish nysanyn tekserý qorytyndysynda Premer-mınıstr Sý resýrstary jáne ırrıgasııa mınıstrligine kontrrettegishtiń tolyq qýatynda jumys isteýin qalpyna keltirý maqsatynda rekonstrýksııalaý jumystaryn jedeldetýdi tapsyrdy. Bul ózen aǵynyn qajetine qaraı retteý jáne ońtústik óńirlerdegi sharýalardy turaqty sýmen qamtamasyz etý úshin qajet.
Oljas Bektenov transshekaralyq sý kózderinen keletin sý kóleminiń azaıýyna baılanysty Úkimet ishki sý qoryn damytýǵa basymdyq berip otyrǵanyn atap ótti.
«Memleket basshysy kóktemgi jáne erigen qar sýyn jınap, ony egistikke tıimdi paıdalaný úshin 20 jańa bógen salý, keminde 15 sý qoımasyna kúrdeli jóndeý júrgizý jóninde tapsyrma bergen bolatyn. Taıaý ýaqytta «Báıdibek ata» jáne «Boraldaı» sý qoımalary arqyly «Bógen» sý qoımasyna qosymsha 113 mln tekshe metr sý berilgeniniń arqasynda Túrkistan qalasy kepildi túrde sýmen qamtamasyz etiledi. Transshekaralyq sý kózderinen keletin sý kólemi jyldan-jylǵa azaıyp keledi. Soǵan baılanysty biz ishki sý qorlaryn barynsha paıdalaný úshin qosymsha sý qoımalaryn salý joldaryn qarastyrýymyz qajet», dep atap ótti O.Bektenov.
Premer-mınıstr Sý resýrstary jáne ırrıgasııa mınıstrligine Túrkistan oblysynyń ákimdigimen birlesip, óńirdegi sý sharýashylyǵy jobalaryn ýaqtyly qarjylandyrýdy jáne júzege asyrýdy tapsyrdy.
