Foto: gov.kz
Qala ákimdiginiń málimetinshe, mundaı shara pasıenttermen birge keletin adamdardyń medısınalyq personalǵa shabýyl jasaý jaǵdaılarynyń jıileýine baılanysty qabyldanǵan.
Polısııa qyzmetkerleri oqys oqıǵalar jıi bolatyn qabyldaý bólmelerinde kezekshilik etedi.
Azamattardyń quqyqqa qaıshy keletin áreketteri týyndaǵan jaǵdaıda polısııa qyzmetkerleri olardyń aldyn alý úshin zań aıasynda áreket etýge quqyly.
Búginde kúzet beketteri eresekterge arnalǵan úsh qalalyq kópsalaly aýrýhanada, №2 qalalyq balalar aýrýhanasynda jáne eki respýblıkalyq klınıkada uıymdastyrylǵan.
Jaqyn arada Polısııa departamentimen birlesip №1 jáne №3 kópsalaly balalar aýrýhanalarynda, sondaı-aq qalalyq perınataldyq ortalyqta kúzet beketterin ornatý máselesi qaralyp jatyr.
Medısına jumyskerleri atalǵan bastamany qoldap, onyń qaýipsiz jáne turaqty jumys ortasyn qurýǵa yqpal etetinin atap ótti.
«Qaýipsizdik beketteri – bizdiń is júzinde qorǵalǵanymyzdyń belgisi. Qabyldaý bóliminde táýligine túrli jaraqattary bar, ártúrli jaǵdaıdy basynan ótkergen 400-ge jýyq adam júginedi. Biz pasıentterdiń ǵana emes, sonymen qatar olardyń týystarynyń da agressııasyna tap bolamyz. Barlyǵy shuǵyl kómekti qajet etedi, al medısınalyq kómek Triage suryptaý júıesi boıynsha júzege asyrylatyny eskerilmeıdi. Ár pasıenttiń ózindik «basymdyq dárejesi» bar. Biraq, ókinishke qaraı, dárigerge degen qurmet joq», dedi №2 kópsalaly qalalyq aýrýhananyń Qabyldaý bóliminiń meńgerýshisi Mádına Tabyldyqyzy.
Aıta keteıik, Prezıdent Qasym-Jomart Toqaev fızıkalyq kúsh qoldanǵany jáne medısına jumyskerlerine qatygezdikpen qaraǵany úshin jazany qatańdatýdy tapsyrǵan bolatyn.
