Almatyda «japon baǵy» bar

Megapolıs qalanyń mereıin asyratyn mádenı, demalys oryn­darynyń qatary kóbeıip keledi. Sonyń biri – «japon baǵy» Alma­tydaǵy Tuńǵysh Prezıdent saıaba­ǵynda paıda boldy. Qala turǵyn­darynyń kózin qýantyp, ­týrısterge tamasha áser syılaıtyn baqqa joly túskender ózin naǵyz Japonııada júrgendeı sezine alady. Almatynyń eń kórikti jerine qonys tepken baqta bári de bar. Bul jobanyń avtorlary baq óz ataýyna saı bolýy úshin barlyq jaǵdaıdy jasaǵan. Qalanyń tabıǵı resýrstary basqarmasynyń málimdeýinshe, ýaqyt óte kele baq munan da kórkem bola túsedi. Qazirdiń ózinde mundaǵy japon halqynyń pagodalary, Kúnshyǵys eli stılindegi oryndyqtar men shamdar, gúlzarlar men kógaldar, toǵandar men bulaqtar kóz tartady. Munda japon sáýlet óneriniń úlgileri de tamasha sheshim tapqan.  Túnde saıabaqta shamdar janyp turady. Sol sııaqty munda Kúnshyǵys eline tán túrli dekoratıvtik aǵashtarǵa qosa, japon shıeleri men japon úıeńkisi kóshetteri otyrǵyzyldy. Osy arada aıta ketýge bolady, buryn da Tuńǵysh Prezıdent parkinde «Jeti qazyna» atty qazaq ultyn nasıhattaıtyn arnaıy baq jasalǵan bolatyn. Qala ákimdigi bul jobamen toqtap qalmaıtynyn, kelesi jyly osynda «Eýropalyq baq» paıda bolady dep otyr. Aınash ESALI, «Egemen Qazaqstan». ALMATY.