Foto: smartnews.kz
Qorǵanys mınıstrliginiń málimetinshe, bul júıe jeke quramnyń psıhologııalyq turaqtylyǵyn arttyrýǵa jáne áskerdegi qaıǵyly oqıǵalardyń aldyn alýǵa yqpal etedi. PSY-táýekel ádistemesin mınıstrliktiń áskerı psıhologtary ázirlegen.
Jańa joba 2025 jylǵy kóktemgi shaqyrý kezinde sátti synaqtan ótken. Sonyń nátıjesinde sýısıdke beıimdilik belgileri bar 470-ten astam jas anyqtalǵan. Olar qyzmetten bosatylyp, qosymsha tekserýge jiberilgen.
Jańa júıe bastapqy skrınıngti, tereń psıhologııalyq tekserýdi jáne qajet bolǵan jaǵdaıda psıhıatrııalyq saraptamany qamtıtyn psıhodıagnostıkanyń kóp satyly mehanızmi. Júıeniń maqsaty psıhoemosıonaldy turaqtylyq turǵysynan Qarýly kúshterde qyzmet etýge daıyn emes adamdardy shaqyrýdan bosatý.
PSY-táýekeldi engizý máseleleri QR QK Ulttyq áskerı-patrıottyq ortalyǵynda ótken vedomstvoaralyq jumys toby otyrysynyń negizgi taqyryby bolǵan. Onyń quramyna Qorǵanys, Ishki ister, Densaýlyq saqtaý, Ǵylym jáne joǵary bilim mınıstrlikteriniń ókilderi, sondaı-aq Ulttyq qaýipsizdik komıtetiniń, Memlekettik kúzet qyzmetiniń jáne basqa da memlekettik qurylymdardyń mamandary kirgen.
Qorǵanys mınıstrligi Tárbıe jáne ıdeologııalyq jumystar departamenti psıhologııalyq jáne áskerı-áleýmettik jumys basqarmasynyń bastyǵy podpolkovnık Arman Qalyshevtiń aıtýynsha, bastama Úkimettiń tapsyrmasy boıynsha iske asyrylyp jatyr. Bul bastama áskerge shaqyrý naýqany sheńberinde júıeli profılaktıkanyń da bir bóligi bolady.
«Biz psıhologııalyq turaqsyz adamdardy elekten ótkizip qana qoımaı, bolashaq áskerı bólimderdiń ujymdaryn yqtımal qaýipti jaǵdaılardan qorǵaýǵa tyrysamyz. Bul bólimshelerdegi densaýlyq, ómir jáne moraldyq ahýalǵa qatysty», dedi podpolkovnık Arman Qalyshev.
Elimizdiń barlyq óńirlerinde PSY-táýekeldi júıesi kezeń-kezeńimen engiziledi. Innovasııa irikteý tıimdiligin arttyryp, armııadaǵy shtattan tys jaǵdaılardyń sanyn azaıtyp, jas áskerı qyzmetshilerdiń psıhıkalyq densaýlyǵyn nyǵaıtýdaǵy mańyzdy qadam bolady dep boljanyp otyr.
