Memleket basshysy Qasym-Jomart Toqaev óz Joldaýynda esirtkige qarsy kúresti ulttyń genofondyn saqtaý máselesi ekenin atap kórsetken edi. Osyǵan baılanysty Bas prokýratýra men ýákiletti organdar esirtki jáne prekýrsorlardy jetkizý arnalaryn, esirtki zerthanalaryn joıýǵa, qylmystyq toptar men esirtki bıznesin uıymdastyrýshylardy anyqtaýǵa, qylmystyq kirister men múlikke tyıym salýǵa, sondaı-aq olarǵa kómektesetin quqyq qorǵaý organdarynyń qyzmetkerlerin áshkereleýge baǵdarlandy.
Bas prokýratýranyń baspasóz qyzmeti Mańǵystaý men Ulytaý oblysy, Almaty jáne Shymkent qalalarynda esirtki dúkenderin uıymdastyrýshylardy áshkerelegen arnaıy prokýrorlar sapaly tergeý amaldaryn júrgizip, bul baǵytta belsendi jumys atqarǵanyn jetkizdi.
«Prokýratýra organdarynyń úılestirýimen bıyl quqyq qorǵaý jáne arnaıy organdar esirtki jáne psıhotroptyq zattardy jetkizýdiń 111 arnasynyń jolyn kesti. Zańsyz aınalymnan 9 tonna esirtki (onyń ishinde 254 kılo sıntetıkalyq esirtki) jáne 12 tonna prekýrsorlar tárkilendi. Esirtki jáne prekýrsorlar kontrabandasynyń faktileri 182-den 80-ge deıin tómendedi. Iаǵnı 56%-ǵa azaıdy», delingen habarlamada.
Buǵan qosa Bas prokýratýra quqyq qorǵaý organdarymen birge ekinshi deńgeıdegi bankterdiń jumysyna ınternet keńistigindegi esirtki dúkenderine baılanysty banktik shottardy anyqtaý, buǵattaý jáne tárkileý algorıtmin engizgen. Barlyq is boıynsha qarjylyq tergeý júrgizý, sonyń ishinde qylmystyq aqshany, esirtki bıznesiniń túpkilikti benefısıarlary men uıymdastyrýshylaryn, sondaı-aq «dropper» aýdarymdary jáne basqa da zańsyz operasııalar úshin banktik shottaryn usynatyn azamattardy anyqtaý týraly nusqaý berilipti.
Sonymen qatar quqyq qorǵaý jáne memlekettik organdar «Kıbernadzor» aqparattyq júıesi arqyly esirtki dúkenderin buǵattaý jumystaryn júrgizip jatyr. Onyń kómegimen búginde esirtki saýdalaıtyn 6 myńnan asa saıt buǵattalǵan.
