Foto: kazgazeta.kz
QR Prezıdenti Qasym-Jomart Toqaevtyń tapsyrmasyna sáıkes, ekonomıkanyń basym salalary úshin joǵary bilikti kadrlardy daıarlaý maqsatynda bilim berý granttarynyń jalpy sanynyń 60%-y ınjenerlik jáne tehnıkalyq baǵyttar boıynsha bólingen.
Konkýrs qorytyndysy boıynsha memlekettik bilim berý tapsyrysy 99%-ǵa ıgerilgen.
Mınıstrlik málimetinshe, bıyl «Serpin» baǵdarlamasy halyq tyǵyz qonystanǵan óńirlerdiń jastary arasynda úlken qyzyǵýshylyq týdyrǵan. Konkýrs nátıjesi boıynsha 2 myńnan astam grant ıegeri Qazaqstannyń soltústik, shyǵys jáne ortalyq óńirlerindegi aldyńǵy qatarly joǵary oqý oryndarynda bilim alatyn bolady.
Jalpy «AMANAT» partııasynyń Saılaýaldy baǵdarlamasyn iske asyrý jónindegi Jol kartasy aıasynda bıyl 77 myńnan astam bilim berý granty bólingen. Memleket basshysynyń tapsyrmasy boıynsha sheteldik jetekshi ýnıversıtettermen seriktestikte jumys isteıtin 20-ǵa jýyq joǵary oqý orny stýdentterdi qabyldaı bastady. Bul – Qazaqstandy óńirlik bilim haby retinde qalyptastyrý jolyndaǵy mańyzdy qadam.
2025 jylǵy memlekettik bilim berý granttaryn taǵaıyndaý konkýrsyna 113 myńǵa jýyq ótinish qabyldanǵan, bul ótken jylmen salystyrǵanda 9 myńǵa kóp.
Sondaı-aq granttardy bólý kezinde áleýmettik osal toptarǵa jatatyn balalar úshin zańnamada belgilengen kvotalar saqtalady.
Daryndy jastardy qoldaý maqsatynda konkýrssyz beriletin granttar da qarastyrylǵan. Olar halyqaralyq olımpıadalar men sporttyq jarystardyń jeńimpazdaryna beriledi.
Budan bólek, mınıstrlik joǵary bilimge qoljetimdilikti keńeıtýge baǵyttalǵan qosymsha tetikterdi engizdi.
Atap aıtqanda, Memleket basshysynyń tapsyrmasy boıynsha bıyl 5 jasar balaǵa esepshot ashý kezinde bastapqy bilim berý kapıtalyn tóleýdi kózdeıtin «Keleshek» biryńǵaı erikti jınaqtaý júıesi iske qosyldy. Sonymen qatar bul júıe barlyq salymshylarǵa memlekettik syıaqy men ekinshi deńgeıli bankter men saqtandyrý kompanııalarynyń syıaqysyn tóleýdi qarastyrady. «Keleshek» júıesi boıynsha jınalǵan qarajatty «Ulttyq qor – balalarǵa» jobasynyń qarajatymen biriktirýge bolady.
2024 jyly alǵash ret oqýǵa jumsalatyn shyǵyndardyń bir bóligin jabatyn saralanǵan granttar taǵaıyndaldy, qalǵan somany ıegerler óz qarajattary esebinen nemese jeńildetilgen oqý nesıesi arqyly tóleı alady. 2025 jyly saralanǵan granttar sany 300 grantty quraıdy. Saralanǵan granttar boıynsha konkýrs osy jyldyń qyrkúıek aıynda ótedi.
Alǵash ret merzimdi áskerı qyzmet ótkerip jatqan azamattar úshin 2 010 bilim berý granty bólindi. Bul shara áskerı qyzmetin ótep bolǵan soń áskerı qyzmetshilerdiń áleýmettik beıimdelýin qoldaýǵa jáne joǵary bilim alýǵa teń múmkindik berý maqsatynda qolǵa alyndy.
Grant ıegerleri tizimin myna jerden júktep alýǵa bolady.
Joǵary oqý oryndaryna qujattardy tapsyrý 25 tamyzǵa deıin (qosa alǵanda) júzege asyrylady.
