Kezdesý barysynda qosylǵan qun salyǵy, korporatıvtik jáne jeke tabys salyǵyna qatysty ózgeristerge erekshe nazar aýdaryldy. Qatysýshylarǵa eki jyldan astam ýaqyt boıy ázirlengen jańartylǵan Kodekstiń basty tujyrymdamalary tanystyryldy. Atap aıtqanda, esep berý nysandaryn ońaılatý jáne eseptilikti azaıtý, arnaıy salyq rejimin jańartý, salyq salý tásilderin qaıta qaraý, aýyl sharýashylyǵy taýar óndirýshileri úshin QQS jeńildikterin 70%-dan 80%-ǵa deıin ulǵaıtý, josparly salyq tekserýlerin alyp tastaý, sondaı-aq salyq eseptiligin qaıtaryp alýǵa tyıym engizý áńgime arqaýyna aınaldy.
«Kásipkerlerden, «Atameken» ulttyq kásipkerler palatasynan jáne salalyq qaýymdastyqtardan kóptegen usynys tústi. Senatta kodeksti pysyqtaý kezinde olardyń basym bóligi eskerildi. Bizdiń mindetimiz – zańdardy qabyldap qana qoımaı, olardyń tájirıbede tıimdi qoldanylýyn qamtamasyz etý. Biz normalardyń oryndalýyn qadaǵalaýdy jalǵastyryp, Úkimetpen birge qosalqy aktilerdi ázirleýge qatysamyz», dedi E.Bolgert.
Sondaı-aq Senat Májiliske jibergen túzetýler týraly da aqparat berip, Parlament bıznesti jańa salyqtyq retteý jaǵdaılaryna kóshý úderisinde qoldaý úshin kásipkerlermen ashyq dıalogti jalǵastyra beretinin aıtty.
Senatorlardyń aımaqqa saparlary aıasynda depýtattar Serik Shaıdarov pen Sovetbek Medeýbaev Ulytaý oblysyndaǵy ınfraqurylymdyq jáne áleýmettik mańyzy bar nysandardyń jaǵdaıymen tanysty. Olar Sátbaev qalasyndaǵy «Kazakhmys Distribution» JShS-na qarasty №1 Jylý elektr ortalyǵyna baryp, stansanyń qazirgi jumysy, óndiristik úderisteri men jabdyqtarynyń jaı-kúıi, sondaı-aq úshinshi kóterilimdegi sorǵy stansasy men №1 magıstraldy jylý jelisin jańǵyrtý jobalarynyń júzege asyrylýy jóninde aqparat aldy.
Sapar barysynda halyqty sapaly aýyzsýmen qamtamasyz etý máselesi de basty nazarda boldy. Senatorlar «Ýıtas-Aıdos» sý alǵyshyndaǵy ekinshi kóterilimdegi sorǵy stansasyn jańǵyrtý jáne Jezqazǵan qalasyndaǵy sharýashylyq-aýyzsý tazartý júıesi sý qubyrynyń qurylysy barysymen tanysty.
Sondaı-aq Jezqazǵan qalasynda «Kazakhmys Energy» JShS-na qarasty jylý elektr ortalyǵynda bolyp, aldaǵy jylytý maýsymyna daıyndyq barysyn kórdi. Budan bólek, sharýashylyq-aýyzsý tazartý nysandarynyń jaı-kúıine jáne Keńgir sý qoımasynyń ekologııalyq jaǵdaıyna erekshe kóńil bólindi.
«Jylytý maýsymyna daıyndyq – halyqtyń ómir sapasyna tikeleı áser etetin másele. Ásirese Sátbaev jylý stansasynda tútin gazdaryn tazartý júıesiniń ornatylyp jatqany mańyzdy. Buǵan deıin bizge qala turǵyndarynan ekologııalyq jaǵdaıǵa baılanysty alańdaýshylyq bildirgen ótinishter túsken. Búgingi qabyldanyp jatqan sharalar – sol suranystarǵa jaýap ári zııandy qaldyqtardy azaıtý jolyndaǵy naqty qadam», dedi S.Medeýbaev.
Sonymen qatar senatorlar oblystyq máslıhattyń turaqty komıssııasynyń otyrysyna qatysyp, Senattyń zań shyǵarý qyzmeti týraly baıandap, óńirlik máselelerdi sheshýde jan-jaqty qoldaý kórsetýge daıyn ekenderin bildirdi.
