Sýretti túsirgender – A.Dúısenbaev, E.ÚKIBAEV
Memleket basshysy jastardy bilim álemindegi jeńisterimen quttyqtap, shynaıy rızashylyǵyn bildirdi. Olardyń halyqaralyq bedeldi bilim saıystarynda top jaryp, elimizdiń atyn álemge pash etýin zor jetistik retinde baǵalady.
– Júzden júırik, myńnan tulpar shyǵý, álemdik jarysta jeńiske jetý ońaı emes. Bilimge degen umtylystyń, naǵyz eńbekqorlyq pen tabandy is-árekettiń arqasynda osyndaı bıikke shyǵyp jatyrsyzdar. Rasynda, darynǵa ıe bolý, bul – baqyt. Biraq jaı ǵana eńbeksiz daryn jetistiktiń kepili bola almaıdy. Darynnyń kózin ashý kerek jáne ony tolyǵymen paıdalana bilý qajet. Ár jeńis, ár medal tynymsyz izdenispen, mańdaı termen, úzdiksiz daıyndyqpen keledi, – dedi Prezıdent.
Qasym-Jomart Toqaev shákirt qabiletin ushtaǵan ulaǵatty ustazdar memlekettik marapatqa laıyq ekenin jetkizip, ozyq oıly urpaq tárbıelegen ata-analarǵa alǵys aıtty. Sondaı-aq el bolashaǵy – jasampaz jastardyń qolynda ekenine nazar aýdaryp, ul-qyzdarymyz árdaıym úzdikter qatarynan tabylatynyn atap ótti.
– Jastarymyz jahandyq sport jáne óner dodalarynda jeńimpaz atanyp, týymyzdy kókte jelbiretip júr. Bilim salasyndaǵy bedelimiz de artyp kele jatyr. Byltyrdan beri oqýshylarymyz 30-dan astam halyqaralyq olımpıada men ǵylymı jarysqa qatysyp, myńǵa jýyq medal aldy. Onyń 200-ge jýyǵy – altyn, 300-den astamy – kúmis, al 500-ge jýyǵy – qola medal. Bul tamasha kórsetkish elimizdegi bilim sapasynyń deńgeıi joǵary ekenin kórsetedi. Taǵy da qaıtalap aıtamyn, biz álemdik jarysta el namysyn qorǵaǵan ár jeńimpazdy maqtan tutamyz. Sizderdi elimizdiń betke ustar, laıyqty azamattary dep sanaımyn. Bolashaqta da Otanymyzdyń odan ári damýyna qomaqty úles qosatyndaryńyzǵa kámil senemin, – dedi Prezıdent.
Jastarǵa barynsha jaǵdaı jasaý memlekettiń basty mindeti. Bul baǵytta aýqymdy is atqarylyp jatyr.
– Qazirgi tańda elimizdiń ár aımaǵynda zamanaýı úlgidegi «Keleshek mektepteri» ashylyp jatyr. Muǵalim mártebesin kóterýge basa mán berilip keledi. Ǵylym jolyna túsken jastarǵa jan-jaqty qoldaý kórsetilip otyr. Bul rette «Bolashaq» halyqaralyq stıpendııasy tıimdi ról atqaryp keledi. Joba aıasynda myńdaǵan jas azamat álemniń ozyq ýnıversıtetteri men zertteý ortalyqtarynda bilim aldy. Búginde olardyń kóbi elimizdi órkendetýge mol úles qosýda. Aldymyzda turǵan mindet – osy stıpendııaǵa naǵyz qabiletti, daryndy balalardy irikteý. Kezdeısoq adamdardy qosýǵa bolmaıdy. Sondyqtan kelesi jyldan bastap halyqaralyq olımpıada jeńimpazdaryn «Bolashaq» baǵdarlamasy boıynsha oqýǵa jiberý týraly sheshim qabyldandy. Osylaısha, biz daryndy ári talapty jastarǵa jan-jaqty qoldaý kórsete beremiz, – dedi Memleket basshysy.
Prezıdenttiń pikirinshe, halyqaralyq bedeldi olımpıadalardaǵy jastardyń jetistikteri ultymyzdyń zııatkerlik qýaty men óskeleń urpaqtyń zor áleýetin tanytady.
– Elimizge ǵalymdar, ınjenerler, pedagogter, dárigerler men basqa da joǵary bilikti mamandar qajet. Ásirese jasandy ıntellekt salasyndaǵy mamandar aıryqsha suranysqa ıe bolady. Innovasııa men joǵary tehnologııalar negizinde elimizdiń aldaǵy damý kezeńderiniń berik irgetasyn qalap jatyrmyz. «Rosatom» kompanııasymen birge salynatyn alǵashqy atom elektr stansasy strategııalyq mańyzǵa ıe. Birer kún buryn onyń qurylysy resmı túrde bastaldy. AES energetıka nysany ǵana emes, ǵylymı-tehnıkalyq progrestiń jarqyn sımvoly bolýǵa tıis. Ázirge onyń ataýy joq. Bul elimizdegi tuńǵysh stansa bolǵandyqtan, halyq arasynda úzdik ataý jóninde baıqaý jarııalaýǵa bolady dep sanaımyn. Osy saıysqa qatysyp, shyǵarmashylyq qarymdaryńyzdy kórsetýge shaqyramyn. Bálkim, sheshim qabyldaǵan kezde sizderdiń de usynystaryńyzǵa súıenermiz, – dedi Prezıdent.
Memleket basshysy jastarǵa ǵıbratty sózin arnady.
– Biz qazir bárimiz bir el bolyp Ádiletti, Taza ári Qaýipsiz Qazaqstandy quryp jatyrmyz. Bul – jaı saıası naýqan emes. Bul – memlekettiligimizdi nyǵaıtý degen sóz. Osy aýqymdy jumysty jastarymyz úshin bastadyq. Endi ony mindetti túrde oryndaýymyz qajet. Onyń bar ıgiligin, eń aldymen, óskeleń urpaq, ıaǵnı, sizder kóresizder! Men elimizdiń jastaryna zor senim artamyn. Respýblıka jastary kózi ashyq, kókiregi oıaý, oıy ushqyr, daryndy, eńbekqor azamattar dep únemi aıtyp júremin. Ul-qyzdarymyz árqashan adal azamat degen atqa saı bolsyn dep tileımin. Eń aldymen Otanǵa, elimizge adal bolyńyzdar. Sizder halqymyzdy jer júzine zııatker ult retinde tanytyp júrsizder. Árdaıym izdenis pen eńbek jolynda bolyńyzdar. О́skeleń urpaq sizderge – talantty jastarǵa qarap boı túzeıdi, – dedi Qasym-Jomart Toqaev.
Is-sharada Prezıdent halyqaralyq jarystarda top jaryp, altyn, kúmis jáne qola medal ıelengen jastarǵa 1500, 1000 jáne 500 aılyq eseptik kórsetkish mólsherinde qarjylaı syıaqy sertıfıkattaryn saltanatty túrde tabystady.
