Elimizdiń barlyq óńirlerinen kelgen júzdegen oqýshy men sheteldik qonaqtar jol qozǵalysy erejelerin bilý, alǵashqy medısınalyq kómek kórsetý boıynsha bilimderin synǵa salyp, sondaı-aq birqatar shyǵarmashylyq jáne tájirıbelik saıystarda baq synady. Olardyń qatarynda — «Bilimpazdar týrnıri», «Jas retteýshi», «Velosıpedti mánerlep júrgizý», «Avtoqala», «Jas sanıtar», «JQE bilgirleri» jáne «Úgitbrıgada» baıqaýlary bar. Qatysýshylar tártip pen joǵary daıyndyq deńgeıin ǵana emes, joldaǵy qaýipsiz minez-qulyqty nasıhattaýdaǵy shyǵarmashylyq qabiletterin de kórsetti.
Sondaı-aq «JJE bilgiri» atalymynda úzdik nátıje kórsetken jáne jol qozǵalysy mádenıetin arttyrýǵa belsendi úles qosqan polısııa qyzmetkerleri de marapattaldy.
«Sizder – bizdiń bolashaǵymyzsyzdar. Búginnen bastap joldaǵy mádenıetti qalyptastyryp, qurdastaryńyzǵa erejeler – qaǵaz júzindegi shart qana emes, qaýipsizdiktiń berik negizi ekenin túsinýge kómektesip júrsizder. Bir kezderi men de JJI otrıadynyń komandıri bolǵanmyn. Bul tájirıbe meniń kásibı jolymnyń bastaýyna aınaldy», dedi Shyǵys Qazaqstan oblysy Polısııa departamentiniń bastyǵy general-maıor Erlan Omarbekov qatysýshylardy quttyqtap.
Memleketaralyq esepte birinshi oryndy Qazaqstan quramasy, al ekinshi oryndy Qyrǵyzstan komandasy ıelendi.
Respýblıkalyq eseptiń qorytyndysy: I oryndy Qostanaı oblysynyń jas jol ınspektorlary otrıady, II oryndy Aqmola jáne Qaraǵandy oblystarynyń jas jol ınspektorlary otrıadtary, III oryndy Almaty qalasy, Abaı jáne Soltústik Qazaqstan oblystarynyń komandalary ıelendi, barlyq jeńimpazdar men júldegerler gıroskýterler, noýtbýkter, planshetter, smart-saǵattar, teleskoptar jáne ózge de zamanaýı qurylǵylarmen marapattalyp, árbir qatysýshyǵa estelik retinde rıýkzak pen monopod tabys etildi.
Qyrǵyz Respýblıkasynyń ókilderine eki eldiń vedomstvolary arasyndaǵy halyqaralyq yntymaqtastyqty damytýǵa jáne baılanystardy nyǵaıtýǵa qosqan úlesi úshin «Qazaqstan polısııasyna 30 jyl» tósbelgisi tabys etildi.
Mereıtoılyq slıot JJI qozǵalysynyń — kóshbasshylyqty, jaýapkershilikti jáne zańǵa qurmetpen qaraýdy qalyptastyratyn shynaıy mektep ekenin taǵy bir márte dáleldedi. Bul – tek erejeni biletin ǵana emes, qaýipsizdik pen tártip qundylyqtaryn qorǵaı alatyn jas urpaqty tárbıeleıtin orta.
