Depýtattar mańyzdy nysandardy aralady

Májilis depýtaty, «Amanat» partııasy fraksııasynyń múshesi Erbolat Satybaldın «Jezqazǵan – Qyzylorda» tas jolynyń jaǵdaıyn baqylap qaıtty. Aımaqtaǵy avtojoldyń 200 shaqyrymnan asa bóligi jańartylyp jatyr.

Erbolat Satybaldın jón­delip jatqan joldardyń sapasyn jeke baqylaýyna aldy. Ári merdigerlerge jumys qarqynyn jedeldetý keregin aıtty. Sondaı-aq ol turǵyndarmen kezdesip, halyqty zańnamalyq deńgeıde atqarylyp jatqan jumystardan habardar etti.

– Eger buryn aqyly joldardan túsken qarajat tek sol joldardyń jóndeý jumystaryna ǵana jumsalsa, endi ol búkil ınfraqurylymnyń damýyna paıdalanylady. Sonymen qatar avtokólik ıesi aqyly jolǵa bereshegi bolsa, kólikti sata almaıdy nemese qaıta tirkeı almaıdy. Júrgizýshiler men tasymaldaýshylardyń birinshi sanattaǵy aqyly joldar sapasyna qatysty shaǵymdaryn tyńdasańyz, zań jobasynyń mańyzy aıqyn kórinedi. Júrgizý­shiler aqyly joldy ýaqtyly tólese de, jol sapasynyń tómendigi saldarynan kólikti jóndeýge qosymsha shyǵyndaný­ǵa májbúr bolady. Eger bul qarajat tegin joldarǵa baǵyt­talsa, sapa standartyn art­tyrýǵa jáne halyqtyń jol sapasyna degen senimin nyǵaıtýǵa múm­kin­dik beredi, – dedi E.Satybaldın.

Jetisý oblysyna jumys sapary aıasynda Májilis depýtaty, «Aq jol» partııasy fraksııasynyń jetek­shisi Azat Perýashev jaqyn­da Taldyqorǵanda ashyl­ǵan «ASMA Industrial» zamanaýı óndiristik akkýmýlıator zaýyty­nyń tynys-tirshiligimen tanysty.

Bul zaýyt – atalǵan oblys úshin mańyzdy ınvestısııalyq joba. Oǵan 3 mlrd teńgeden astam qarjy quıylyp, 180 jańa jumys orny ashyldy.

– Biz jańa tehnologııalardy qoldaýymyz kerek. Eger zamanaýı talaptarǵa saı memleket bolǵymyz kelse, ekonomıkalyq jobalardy júzege asyryp, osyndaı zaýyttardy iske qosý asa mańyzdy, – dedi A.Perýashev.

Kásiporyndy aralaý barysynda depýtat shıkizat jetkizý, salyq salý jáne basqa da bir­qatar máselege nazar aýdardy. Zaýyttyń bas dırektory Serik­baı Ájmaǵanbetov bul baǵytta eshqandaı túıtkil joq ekenin, shıkizat jetkizý ýaqtyly júzege asyrylyp otyrǵanyn jetkizdi.

Al Májilis depýtaty, JSDP fraksııasynyń múshesi Naýryz Saılaýbaı Qapshaǵaıdaǵy №6 jaǵajaıda jumys isteıtin kásip­kerlermen kezdesti. Júz­desýde jaǵalaý aýmaǵyn abattandyrý, ınfraqurylymdy jańǵyrtý jáne bıznestiń múddesin qorǵaý máseleleri talqylandy.

Kezdesýge Qonaev qalasynyń ákimi Ashat Berdihanov, «Atameken» kásipkerler palatasy­nyń, «Jasyl qala» mekemesiniń ókilderi men ózge de kásipkerler qatysty.

Naýryz Saılaýbaı Qapshaǵaı sýqoımasynyń týrıstik áleýetin bıznes ókilderimen birlese damy­tý­dyń mańyzdylyǵyn atap ótti.

– Jaǵalaý aımaǵynyń damýy kásipkerlerdiń quqyqtaryn shekteý esebinen emes, olarmen áriptestik arqyly júzege asýy úshin kúsh salamyz. Týrızmdi damytýǵa óz kúshin de, qarajatyn da jumsap júrgen azamattardyń múddeleri qorǵalýǵa tıis, – dedi depýtat.

Kezdesýge bastamashy bolǵan kásipkerdiń biri – Qambar Baıkenov. Ol týrızm salasynyń basqarylýǵa tıisti qurylymda bolýy kerek ekenin aıtty.

Basqosýda kásipker­ler ınje­nerlik kommýnıka­sııa­lar­dyń joqtyǵy, keshendi abattan­dyrý­dyń qajettiligi men ákim­shilik shekteýler sııaqty birqatar máselege nazar aýdardy. Qala ákimdigi men tıisti mekeme ókilderi bul máselelerdi birlese sheshýge daıyn ekenderin jetkizdi. Kezdesý aıaǵynda osy maýsymnyń sońyna deıin №6 jaǵajaıdy damytý josparyn daıyndaý týraly sheshim qabyldandy.