Foto: Aqorda
«Muǵalimniń quqyǵyn qorǵaý máselesi árdaıym basty nazarda bolýǵa tıis. Men sóz basynda ustazdardyń óz mindetinen tys jumystardan bosatylǵanyn aıttym. Biraq, keıde jergilikti bılik ókilderi zań talaptaryn óreskel buzyp jatady. Prokýratýra organdary mundaı zań buzýshylyqtarǵa tosqaýyl qoıýy kerek
Sondaı-aq balalarǵa qatysty kez kelgen jazataıym jaǵdaı úshin de muǵalimdi jazalaý orynsyz dep sanaımyn. Mektepten tys jerde, ata-analardyń jaýapsyzdyǵynan oqys oqıǵa bolsa, oǵan ustaz jaýapty emes. Almaty oblysynda túlekter arasynda bolǵan qaıǵyly jaǵdaı úshin dırektor men muǵalimder jaýapqa tartylyp, jumystan shyǵaryldy. Mınıstrlik olardyń múddesin qorǵap qaldy. Durys. Biz mundaı keleńsizdikke jol bermeýimiz kerek.
«Pedagog mártebesi týraly» zańǵa ustaz quqyǵyn qorǵaý jóninde ózgerister engizý qajet dep sanaımyn. Memlekettiń mindeti – muǵalimniń qoǵamdaǵy bedelin jáne mártebesin meılinshe arttyrý.
Taǵy bir másele. Mańǵystaýda balalar sapasyz tamaqtan ýlanyp qalǵanyn bilesizder. Osy sumdyq jaǵdaıdan keıin mekteptegi tamaqtyń sapasyn qadaǵalaý jumysyn Densaýlyq saqtaý mınıstrligi tolyǵymen óz mindetine aldy. Bul óte durys sheshim boldy. Jalpy, bilim salasy – memleket úshin strategııalyq máni bar sala. Sondyqtan, quzyrly memlekettik organdar bilim salasyndaǵy máselelerden syrt qalmaýy kerek.
Túptep kelgende, balalardyń amandyǵy, olardyń densaýlyǵy jáne sapaly bilim alýy – elimizdiń keleshegine tikeleı qatysy bar másele», dep atap ótti Q.Toqaev.
