Kaspıı teńiziniń jaǵalaýynda bes memlekettiń áskerı-teńiz kúshteri ornalasqan. Qaýip-qater tóngen jaǵdaıda qaı eldiń bolsyn sol jerdegi kúshteri ony quryqtaý qajet, tipti keıde birlesken operasııalar da oryndalady. Kaspıı aıdynynda áskerı-teńiz kúshteriniń jaýyngerleri aldymen qarsylastyń keme tobyna birlesken soqqy berý amaldaryn jasady. Bul tapsyrma áskerı kemeler men Mı-8 jáne Mı-35 tikushaqtaryna júkteldi.
Sondaı-aq Zymyrandy artıllerııalyq kemesiniń komandıri Erlan Ospanovtyń aıtýynsha, shabýyldaýshy jaqtyń kemelerine, áýe nysandaryna qarsy toıtarys berý, sý ústi dıversanttarynyń kózin joıý jaýyngerlik atystary ótkizilgen. Áskerı-teńiz kúshteri dabyl boıynsha kóterilip, naqty urysqa jaqyn jaǵdaıda bólimshelerdiń jaýyngerlik daıyndyq deńgeıin tolyq tekserýge múmkindik bergen.
Sý astynan jarylǵysh zattar izdep, apatqa ushyraǵan kemeni qutqarýǵa teńizshiler qatysty. Olar sondaı-aq teńizde keme júrgizý mashyqtaryn pysyqtady. Áskerı-teńiz kúshteri Kaspıı teńiziniń ortalyq bóliginde oqý-jattyǵý shtýrmandyq joryǵyn ótkizgen. Shtýrmandyq daıyndyq boıynsha shtabtyń jetekshi mamany kapıtan-leıtenant Qýanyshbek Dúısembaevtyń aıtýynsha, munda teńizshiler kemeni basqarý daǵdylaryn jetildirip, shtýrmandyq qyzmetti uıymdastyrýdy tájirıbe júzinde meńgerdi.
Sabaq barysynda jaýyngerler teńizdegi áskerı is-qımyldar teatrynyń erekshelikterin zertteýge jáne túrli keme júrgizý ádisterin qoldaný arqyly navıgasııalyq mindetterdi de oryndaǵan. Oqý joryǵynyń qorytyndysy boıynsha shtýrmandyq jaýyngerlik bólimsheniń ofıserleri synaqty sátti tapsyrǵan.
Teńizdegi praktıkalyq operasııalarǵa Áskerı-teńiz kúshteri zapastaǵy ofıserleri alǵash ret qatysqan. Jıynǵa Shahmardan Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń áskerı-teńiz kafedrasynda buryn oqyǵan 30 áskerı mindetti tartyldy. Olardyń barlyǵy – korablderdi shtýrmanmen qamtamasyz etý, radıotehnıkalyq baılanys quraldaryn, sondaı-aq dızel-energetıkalyq qondyrǵylardy paıdalaný jáne jóndeý salasyndaǵy mamandar.
Jıyn aıaqtalǵan soń jaqsy nátıje kórsetkenderge zańnamaǵa sáıkes kezekti áskerı shen berildi. Mundaı jıyndardy ótkizý rezervti daıarlaý júıesin damytýdaǵy jáne el Áskerı-teńiz kúshteriniń jaýyngerlik áleýetin nyǵaıtady. Jedel-taktıkalyq oqý-jattyǵýdyń qorytyndysy boıynsha, elimizdiń teńiz áskerine «Kaspııdegi qaýipsizdikti qamtamasyz ete alatyn deńgeıde», degen baǵa berildi.
– Oqý-jattyǵý qorytyndysy boıynsha jeke quram jedel jáne taktıkalyq daıarlyq deńgeıin arttyryp, bólimsheler arasyndaǵy ózara is-qımyl, sondaı-aq Kaspıı teńiziniń otandyq sektorynda qaýipsizdikti qamtamasyz etý jónindegi mindetterdi tıimdi oryndaý qabileti boıynsha qoıylǵan maqsattarǵa qol jetkizdi, – dedi bas qolbasshynyń orynbasary-QK ÁTK bas qolbasshysy basqarmasy jaýyngerlik daıarlyq basqarmasynyń bastyǵy 1-dárejeli kapıtan Danııar Haırýshev.
