Bul týraly Memlekettik kirister komıteti tóraǵasynyń orynbasary Janybek Nurjanov málimdedi.
Basty jańalyqtardyń biri – tekserýler men bereshekti óndirip alý isinde qatań sharalardan bas tartý. Endi shaǵyn kólemdegi salyq qaryzy úshin kásipkerlerdiń esepshottary avtomatty túrde buǵattalmaıdy. Onyń ornyna eskertý júıesi kezeń-kezeńimen engizilip, bıznes ıelerine qatelikterdi aıyppulsyz túzetýge ýaqyt beriledi.
«Salyqtyq ákimshilendirýdiń tásilderi túbegeıli ózgeredi. Birinshiden, kameraldyq tekserýler endi eskertý sıpatynda júrgiziledi. Ekinshiden, bereshekti óndirip alý, tólem merzimin keıinge qaldyrý jáne bólip tóleý rásimderi edáýir jeńildeıdi. Úshinshiden, eger bereshek kólemi az bolsa, kásipkerlerdiń shottary avtomatty túrde buǵattalmaıdy. Onyń ornyna kezeń-kezeńimen habarlandyrý júıesi qoldanylady. Bul bızneske ýaqytyly túzetý engizýge múmkindik beredi», dedi komıtet tóraǵasynyń orynbasary.
Sonymen qatar shaǵyn jáne orta bızneske, sondaı-aq ózin-ózi jumyspen qamtyǵan azamattarǵa arnalǵan arnaıy salyq rejimderi jańartyldy.
