Bólimshe meńgerýshisi Arnat Baızaqovtyń aıtýynsha, artroskopııa kishigirim tilikter arqyly zaqymy az shaǵyn ota jasaýǵa múmkindik beredi. Osyndaı ozyq tehnologııanyń arqasynda býynnyń búlingen bólikterin barynsha zaqymdamaı qalpyna keltirýge bolady. Ári mundaı ádispen jasalǵan otadan keıin naýqastyń da densaýlyǵy qalpyna tez keledi.
Al ota jasatqan naýqasqa kelsek, 19 jastaǵy pasıent bir jarym jyl buryn qulap, ıyǵyn jaraqattap alǵan. Dástúrli em-domnan nátıje bolmaǵan, biraq jas jigit ortohırýrgterdiń kómegine júginýge asyqpaǵandyqtan, jigittiń ıyǵy osy ýaqyt ishinde 13 ret shyǵyp úlgergen.
«Dıagnostıka barysynda naýqastyń ıyǵy shyǵyp, ıyqtaǵy súıektiń basy synǵany, jaýyryn men býyn erneýi zaqymdanǵany anyqtaldy. Ádette mundaı dıagnoz qoıylǵan jaǵdaıda operasııa ashyq ádispen jasalady. Biraq syrqattyń anamnezin, jasyn, sportpen shuǵyldanatynyn eskere otyryp, shaǵyn ınvazıvti tehnıkany qoldaný týraly sheshim qabyldandy», deıdi Arnat Baızaqov.
Hırýrgter birden eki operasııa jasady. Birinshisi: aldyńǵy sińir erneýin qalpyna keltirýge baǵyttalǵan Bankart otasy. Ekinshisi: ıyq býynynyń artqy bóligin bekitýge arnalǵan remplıssaj dep atalatyn operasııa. Operasııalar MÁMS qarajaty esebinen jasaldy. Aýrýhanadan shyqqan soń pasıent 6 aıǵa deıin reabılıtasııadan ótýi tıis.
«Buryn mundaı otalar úlken tilik arqyly, ashyq ádispen jasalatyn. Saldarynan asqyný qaýpi artyp, qalpyna keltirý merzimi de uzaratyn, bul jolǵy operasııanyń biregeıligi de osynda», deıdi maman.
Qazirgi zamanǵy artroskopııa ota barysynda bolatyn zaqymdaný men ınfeksııanyń aldyn alýǵa, ońaltý prosesin tezdetýge múmkindik beredi. Sebebi qoldanylatyn beınekameralar dáldikti arttyrady, al, ózdiginen ydyraıtyn bıoımplant ýaqyt óte kele súıek tinimen aralasyp ketedi. Iаǵnı, qaıta ota jasaýdy qajet etpeıdi.
«Ota kishigirim tesikter arqyly jasaldy. Biraq nátıjesi ashyq operasııadan kem emes jáne munda naýqas ómirine, densaýlyǵyna tónetin qaýip edáýir azaıady. Zamanaýı bekitkishter men ımplanttar otanyń qaýipsizdigi men tıimdiligin arttyrady», deıdi Arnat Baızaqov.
