Kezdesýde 2023–2029 jyldarǵa arnalǵan joǵary bilim men ǵylymdy damytý tujyrymdamasy, jasandy ıntellekt jáne sıfrlyq bilim berý, AI-SANA jobasy, ınfraqurylymdy damytý, jastardy qoldaý jáne ǵylymı jobalardy qarjylandyrý qajettigi sóz boldy. Sondaı-aq jalaqy men áleýmettik kepildikterdi arttyrý, akademııalyq utqyrlyqty keńeıtý, qazaqstandyq JOO-lardyń halyqaralyq reıtıngterdegi ornyn jaqsartý jáne bilim berý baǵdarlamalaryn jańa tehnologııalarmen jańartý máseleleri kóterildi.
Mınıstr Saıasat Nurbek demografııalyq ósimge baılanysty joǵary bilim berý júıesine túsetin júktemeniń artqanyn atap ótti.
«Úsh jyl buryn biz 620 myń stýdentpen bastaǵanbyz. Qazirdiń ózinde 680 myńnan astam stýdent oqyp jatyr. Al 2029-2030 jyldarǵa qaraı, bizdiń boljam boıynsha, stýdentter sany 1 mıllıonǵa jetedi dep otyrmyz. Infraqurylym, sıfrlyq platformalar, úzdiksiz bilim, Coursera tárizdi halyqaralyq platformalarmen seriktestikter – munyń bári osy demografııalyq ósimge tikeleı baılanysty», dedi ol.
Jataqhana máselesine de erekshe toqtalǵan mınıstr Almatyda arnaıy Ahýaldyq ortalyq ashylǵanyn aıtty. Bul ortalyq arqyly stýdentter táýlik boıy jataqhanaǵa qatysty kómek ala alady. Mınıstrdiń aıtýynsha, mundaı sharalar jańa oqý jyly qarsańynda stýdentterdiń barlyǵyn baspanamen qamtamasyz etýge baǵyttalǵan.
Kezdesýde Memleket basshysynyń Joldaýynda belgilengen mindetterdiń júzege asyrylý barysy da baıandaldy. Atap aıtqanda, JOO bazasynda jasandy ıntellekt mamandaryn daıarlaý, «Keleshek» biryńǵaı erikti jınaqtaý júıesi men «Mamandyǵym – Bolashaǵym» jobasynyń iske asyrylýy týraly tyń aqparattar usynyldy.
Resmı bólimnen keıin mınıstr azamattardy jeke qabyldap, olardyń jeke máselelerin tyńdady. Jergilikti turǵyndar ǵylym men bilim salasynda qolǵa alynǵan ózgeristerge belsene atsalysýǵa daıyn ekendikterin jetkizip, ashyq pikir almasý formatyna rızashylyq bildirdi.
