Jańa tabıǵı park aýmaǵy taýly jáne taý etegindegi aımaqtardy qamtyp, ósimdikter men janýarlardyń sırek kezdesetin túrlerin qorǵaýǵa baǵyttalǵan.Onyń jalpy aýmaǵy 86 632 gektardy quraıdy.
Parktiń bıologııalyq ártúrliligi erekshe baı: munda Qazaqstannyń Qyzyl kitabyna engen qar barysy, arqar, úndi jaırasy, qyzyl qasqyr jáne Túrkistan sileýsini mekendeıdi. Sońǵy júrgizilgen sanaq nátıjeleri boıynsha park aýmaǵynda 8 qar barysy, 120 arqar, 20 úndi jaırasy jáne 22 sileýsin tirkelgen.
Merki memlekettik óńirlik tabıǵı parki – tabıǵatty qorǵaý sharalaryn júıeleýmen qatar, ǵylymı-zertteý jumystaryn júrgizýge, ekologııalyq aǵartýshylyqty arttyrýǵa jáne turǵyndar men qonaqtar úshin ekotýrızmdi damytýǵa múmkindik beredi. Ol úshin taýǵa shyǵý, jaıaý jáne atpen serýendeý, qustardy baqylaý sııaqty ekotýrıstik baǵyttar qarastyrylýda.
Tabıǵı resýrstar jáne tabıǵat paıdalanýdy retteý basqarmasynyń málimetinshe, park aýmaǵynda týrıstik soqpaqtar, tanymdyq baǵyttar men demalys aımaqtary kezeń-kezeńimen qalyptastyrylyp, tabıǵatty qorǵaý talaptary qatań saqtalatyn bolady.
