Sýretti túsirgen – Erlan OMAR, «EQ»
Astyqty aýdan erte kóktemde kópjyldyq ekpe shópti qosyp eseptegende 695,7 myń gektar alqapqa dán sińirgen. Onyń ishinde burshaq daqyldary da bar. Aýdan dıqandary bıdaı (572 myń gektar) men arpadan (90,2 myń gektar) bólek, kartop pen kókónis ósirýge de kóńil aýdaryp otyr. Astyq úshin arpalys sátti ótse, 604,2 myń tonna ónim jınalýǵa tıis. Sary altyndaı mólt-mólt etip, samal jelmen terbelgen masaq kóz qýantady. Jazda kúnniń ystyq bolýy sebepti sabaǵynda turyp pisip te qaldy. Endi dıqandar tikeleı orýǵa kóshpek. Bul ádistiń bir jaqsy jeri ýaqyt pen qyrýar kúsh-jiger únemdeledi.
Maıly daqyldar alqaptary 8 sentnerden ónim berip otyr. Mal azyǵy daqyldary 9,8 myń gektarǵa otyrǵyzylǵan. Onyń ishinde birjyldyq jáne kópjyldyq ekpe shópter de bar. Bıylǵy shyǵymy – jaqsy.
Jarqaıyńdyq dıqandar bıyl sapaly tuqymnan qıyndyq kórgen joq. Zııankesterdiń aldyn alý jumystary tııanaqty júrgizildi. Bul tarapta 600 myń gektar aýyl sharýashylyǵy jeri muqııat óńdelip, oıǵa alǵan sharýa 100 paıyz oryndaldy. Oblystyq bıýdjetten bólingen qarjynyń esebinen 16,3 myń gektar jer shegirtkege qarsy óńdeldi. Respýblıkalyq bıýdjetten bólingen qarjynyń arqasynda 136 myń gektar alqap zııankesterden tazartyldy. Egindi aýrýdan emdeý úshin 42,9 myń gektar alqapqa dári sebildi.
Bıylǵy egin oraǵyna aýdanda 974 astyq jınaıtyn kombaın qatystyrylmaq. Aldyn ala esepke qaraǵanda, árbir astyq jınaıtyn kombaınǵa 696 gektardan keledi eken. Aýa raıy qolaıly bolsa, egin oraǵyn 20–22 kúnde tolyq aıaqtap shyǵýǵa ábden bolady. Aýdanda alqaptan qyrmanǵa astyq tasıtyn 338 júk mashınasy bar. Oǵan qosymsha 266 traktor tirkemeleri kómekke kelmek. Oraq naýqanyna qajetti janar-jaǵar maı da jetkilikti. «Esil» munaı bazasyna kelisimshart boıynsha ázirshe 762,374 tonna janar-jaǵar maı jetkizilgen. 485,9 myń tonna astyq saqtaıtyn 9 astyq qabyldaý kásiporny da tas-túıin daıyn. Oǵan qosa aýyl sharýashylyǵy qurylymdarynda 324 myń tonna dán saqtaýǵa múmkindik bar. Barlyǵyn qosqanda aýdanda 809,9 myń tonna ónimdi saqtaýǵa ábden bolady.
Aýdan dıqandary qazirdiń ózinde keler jyldyń egini úshin qamdanyp otyr. 88 myń gektar alqap parǵa jyrtyldy. Jemshóp jaıy da jaqsy. 38,5 myń gektar alqaptyń shóbi shabylyp, sapaly shóp qystaqtarǵa jetkizildi.
Aqmola oblysy,
Jarqaıyń aýdany
