Sýret: kostanaytany.kz
Sarykól aýylynda senatorlar aýyldyń damýyna belsendi úles qosyp júrgen «Agro Parasat» JShS-ǵa bardy. Keıingi eki jylda kompanııa óz qarajaty esebinen sport alańdaryn, hokkeı kortyn salyp, «Taza Qazaqstan» respýblıkalyq baǵdarlamasy aıasynda aýyl kóshelerin jóndegen.
Sonymen qatar depýtattar Tagıl aýylyndaǵy birinshi reprodýksııaly tuqym óndirýge mamandanǵan «Sataev B.H.» sharýa qojalyǵynyń jumysymen tanysty. Sapar barysynda densaýlyq saqtaý salasyna da erekshe kóńil bólindi. Senatorlar Sarykól aýdandyq aýrýhanasyna baryp, medısına qyzmetkerlerimen kezdesip, mekemeniń ózekti máselelerin talqylady. Depýtat S.Karplıýk aýdandyq aýrýhanadaǵy káriz júıesiniń máselesin sheshýdiń mańyzdylyǵyn atap ótti.
«Aýrýhanaǵa sý burý júıesin ornatý jobasyn aıaqtaý – kún tártibindegi eń ózekti másele. Ol keshendi sheshimdi jáne qajetti qarjylandyrýdy talap etedi. Bul máseleni biz respýblıkalyq deńgeıde kóteremiz», dedi ol.
О́z kezeginde senator B.Aqqojına áleýmettik nysandardy memleket tarapynan qoldaý mańyzdylyǵyna toqtaldy.
«Aýyldaǵy árbir medısınalyq nysan – turǵyndar úshin ómirlik mańyzdy resýrs. Mundaı ınfraqurylymdyq jobalardy keıinge qaldyrýǵa bolmaıdy, sebebi olar halyqtyń ómir sapasyna tikeleı áser etedi», dedi ol.
Sapar qorytyndysynda parlamentshiler aýdandyq máslıhat depýtattarymen jáne jergilikti qaýymdastyq ókilderimen kezdesip, aýrýhana ǵımaratyn jóndeý, sý burý júıesin jetildirý jáne jobalyq-smetalyq qujattamany qarjylandyrý máselelerin talqylady. Jumys sapary barysynda kóterilgen barlyq usynys pen másele aldaǵy bıýdjet qalyptastyrý men zań shyǵarý qyzmetinde eskeriletinin atap ótti.
Sondaı-aq senatorlar Bekbolat Orynbekov pen Sáken Arýbaev Jambyl oblysynyń Shý aýdanyna baryp, qurylys jumystarynyń barysymen jáne birqatar mańyzdy áleýmettik ári óndiristik nysandardyń jaǵdaıymen tanysty.
Alǵashqy nysan – «Fufeng» kompanııasynyń júgeri óńdeý zaýyty boldy. Bul joba óńirdiń agroónerkásiptik keshenin damytýda jáne jańa jumys oryndaryn ashýda strategııalyq mańyzǵa ıe. Keıin depýtattar Shý qalasynyń temirjol vokzalynda bolyp, onyń jańǵyrtý jobasymen tanysty. Atalǵan joba aýdannyń kólik-logıstıkalyq áleýetin arttyryp, jolaýshylarǵa kórsetiletin qyzmet sapasyn jaqsartýǵa múmkindik beredi.
Depýtattar «Gorgaz» shaǵyn aýdanyndaǵy aýyzsý júıesine erekshe nazar aýdardy. Bul nysan turǵyndardy sapaly aýyzsýmen qamtamasyz etýge jáne kommýnaldyq qyzmetterdiń deńgeıin kóterýge baǵyttalǵan. Sondaı-aq senatorlar Jıenbet aýylynda salynyp jatqan 100 oryndyq jańa mekteptiń qurylysymen tanysty. Bul bilim oshaǵy aýyl balalaryna qolaıly ári zamanaýı jaǵdaıda bilim alýǵa múmkindik berip, aýdannyń bilim berý salasyn damytýǵa eleýli úles qospaq.
Sapar qorytyndysynda depýtattar kóterilgen barlyq másele men usynys nazarǵa alynyp, tıisti deńgeıde sheshim qabyldanatynyn atap ótti.
