Oblystyq bilim basqarmasy basshysynyń orynbasary Dáýlet Ilııasovtiń aıtýynsha, óńir jańa oqý jylyn jańartylǵan mektepter, jańa kabınetter, tolyq qaýipsizdik jáne jylytýǵa daıyndyqpen qarsy alady. «Renovasııa» baǵdarlamasy aıasynda 2025-2027 jyldary 75 mektep kezeń-kezeńimen jańǵyrtylady. Bıyldyń ózinde 8 mektep tolyq jóndeýden ótip, jańa oqý jylyna deıin daıyn bolady. Onyń ishinde Semeı qalasyndaǵy №32 orta mektep, Jańasemeı aýdanyndaǵy Túrksib jáne Prırechnoe mektepteri, Aıagózdegi №7 orta mektep pen Q.Qadyrjanov atyndaǵy mektep, Besqaraǵaıdaǵy Glýhovka mektebi, Úrjar aýdanyndaǵy B.Momyshuly mektebi bar. Jóndeý jumystarynyń basym bóligi 1 qyrkúıekke deıin aıaqtalmaq.
Orynbasardyń sózine sensek, oblysta úsh aýysymdy mektep joq.
Sonymen birge «Keleshek mektepteri» ulttyq jobasy aıasynda eki jańa mektep oqýshylardy qabyldaýǵa daıyn. Semeı qalasy Vodnyı kentindegi mektep 1 qyrkúıekte ashylady. Aıagóz qalasyndaǵy 600 oryndyq jańa mektep 2-toqsanda paıdalanýǵa berilmek. Buǵan qosa Semeıdiń Shyǵys Oń kentinde 300 oryndyq mekteptiń qurylysy jalǵasýda.
– Jalpy oblystaǵy 8 200 oryn tapshylyǵynyń 31 paıyzy osy jobamen salynyp jatqan 5 mektep esebinen sheshilmek. Qalǵan tapshylyqty joıý úshin respýblıkalyq bıýdjet esebinen aldaǵy úsh jylda 11 mektep salý josparlanǵan. Apatty jaǵdaıda dep tanylǵan úsh mekteptiń máselesi de kezeń-kezeńimen sheshilip keledi. Jarma aýdanynda 100 oryndyq jańa mekteptiń qurylysy bastaldy. Aqsýat aýdanyndaǵy Ekpin aýylynda 300 oryndyq mekteptiń jobalyq qujattamasy saraptamaǵa jiberildi. Semeıdegi №11 mekteptiń ornyna jańa mektep salýǵa qujat ázirlenip jatyr, – deıdi ol.
Infraqurylymdy jaqsartý maqsatynda bıyl 12 mektepke kúrdeli jóndeýge 2 mlrd 900 mln teńge bólindi, onyń beseýi «Aýyl – el besigi» baǵdarlamasy aıasynda. Budan bólek 174 mektepte aǵymdaǵy jóndeý jumystary júrgizilipti.
Abaı oblysy
