Foto: Sý resýrstary jáne ırrıgasııa mınıstrligi
Vegetasııa kezeńi bastalǵaly Almaty oblysynda 1,2 mlrd tekshe metr sý alynyp, 136 myń gektar egistik sýarylǵan. Al Jetisý oblysynda 1 mlrd tekshe metr sý alynyp, 132 myń gektar jer sýaryldy. Jambyl oblysynda alynǵan sý kólemi 897 mln tekshe metr bolǵan, 70 myń gektar kólemindegi egistik sýarylǵan. Al kestege sáıkes kúrishtiń masaqtaný kezeńi ótip jatqan Qyzylorda oblysynyń alǵan sý kólemi 3,476 mlrd tekshe metrdi qurap otyr. Túrkistan oblysyna 3,27 mlrd tekshe metr sý berilgen.
Elimizdiń basqa óńirlerinde jalpy kólemi 327 mln tekshe metr sý alynǵan.
Sý resýrstary jáne ırrıgasııa birinshi vıse-mınıstri Nurlan Aldamjarovtyń aıtýynsha elimizde sýarý maýsymy aıaqtalýǵa jaqyn. Mınıstrlik qabyldaǵan sharalar vegetasııa kezeńiniń qalǵan bóligin turaqty ótkizýge múmkindik berip otyr.
«Eldiń ońtústiginde kanaldar arqyly sýdy kezekpen berý kesteleri bekitildi, sorǵy qondyrǵylary men tik drenaj júıeleri qosyldy, sondaı-aq sý sharýashylyǵy jaǵdaıyna turaqty monıtorıng júrgizilip, kollektorlyq-drenajdyq sý qaıtalama paıdalanylyp jatyr», dedi N.Aldamjarov.
