Tabıǵatta flamıngolar óte úlken top bolyp ómir súredi. Myńdaǵan qustyń bir jerge jınalýy – olar úshin qaýipsizdik pen senimdiliktiń kepili. Úlken toptyń ishinde júrgen qus ózin qorǵaýly sezinedi jáne bul sezim olardyń juptasýyna tikeleı áser etedi.
Alaıda zooparktegi jaǵdaı múldem bólek. Shekteýli keńistikte ustalǵan qustardyń sany ádette az bolady. Mundaı kezde flamıngolardyń tabıǵı túısigi iske qosylyp, olardy úreı bıleıdi. Qustyń sanasynda «top tym az bolsa, demek qaýip bar» degen sıgnal paıda bolady. Nátıjesinde olar juptasýdan bas tartyp, kóbeımeı qoıady.
Mine, osy máselege qatysty keıbir zooparkter qustar mekendeıtin alańnyń ishine úlken aınalar ornatady. Sonda flamıngolar aınalaǵa qaraǵanda ózderiniń beınesin kóredi. Biraq olar aınadaǵy beıneni «ózim» dep emes, jańa qus dep qabyldaıdy. Osylaısha, top birden birneshe ese kóbeıip ketkendeı áser beredi. Qustar ózin qaýipsiz ortada sezinedi de, urpaq órbitýge beıimdele bastaıdy.
Ǵalymdar mundaı tájirıbeniń jemisti ekenin dáleldedi: aınalar ornatylǵan alańda flamıngolar uıa sala bastaıdy, jumyrtqa basady jáne tabıǵı ortadaǵydaı tártipke kóshedi.
Bul tásildiń qosymsha nusqalary da bar. Mysaly, keıbir jerde qaǵazdan jasalǵan flamıngo beıneleri qoıylady. Jasandy uıalar jasalyp, tipti jumyrtqa músinderi ornalastyrylady.
