Mıssııa aıasynda amerıkalyq dárigerler 10 kúrdeli rekonstrýktıvtik operasııa júrgizdi. Pasıentter qatarynda týa bitken aqaýlarmen nemese aýyr jaraqattan keıingi asqynýlarmen kúresip júrgen balalar men eresekter boldy. Jolǵa qoıylǵan otalar tek emdeýge ǵana emes, qazaqstandyq mamandardyń kásibı biliktiligin arttyrýǵa baǵyttaldy. Operasııalar tájirıbelik sabaq retinde tikeleı efırde elimizdiń 15 óńirindegi dárigerlerge kórsetilip, 150-ge jýyq maman jańa bilim alyp, sertıfıkatqa ıe boldy.
Bul ıgi istiń júzege asýyna AQSh-ta turatyn bes otandasymyz bastamashy boldy. Aınur Rodjers, Gúlnár Febres, Toqjan Balderston, Álfııa Bıkıneeva jáne Ksenııa Kameneva qurǵan KCBANA assosıasııasy mıssııanyń negizgi uıymdastyrýshysy atandy. Assosıasııa resmı túrde jyl buryn tirkelgenimen, pandemııa kezinde-aq el dárigerlerine kómek kórsetip, emge muqtaj balalardy qoldaýmen aınalysa bastaǵan edi.
KCBANA músheleri dástúrli joldan bas tartyp, pasıentterdi shetelge jiberýdiń ornyna amerıkalyq mamandardy Qazaqstanǵa shaqyrýdy jón kórdi. Mundaı tásil kóp adamǵa birden kómek kórsetip qana qoımaı, otanyń úı jaǵdaıyna jaqyn, qolaıly ortada jasalýyna múmkindik berdi.
«Eger bul joba kem degende bir balaǵa kómektesse, sonyń ózi jeńis bolar edi», deıdi KCBANA-nyń negizin qalaýshylardyń biri Aınur Rodjers.
Onyń aıtýynsha, daıyndyq kezeńinde komanda bar ýaqytyn osy iske arnaǵan.
«Túnde, demalys kúnderi, negizgi jumysymyzdan keıin eńbek ettik. Alǵashqy kúni balalardy kórgende bar sharshaýymyz umytyldy», dep eske aldy ol.
Mıssııaǵa plastıkalyq hırýrg Darrın Hıýbert, bet júıkesi salasyndaǵy jetekshi maman Tomas Lı, operasııalyq medbıke Merılın Beıgen jáne Pıttsbýrg ýnıversıtetinde bilim alǵan, búginde AQSh-ta qyzmet atqaryp júrgen otandasymyz Jazıra Irgebaı qatysty.
«Aldaǵy ýaqytta Qazaqstan men AQSh dárigerleri arasynda jańa yntymaqtastyq jobalary iske asady dep senemiz», deıdi Aınur Rodjers.
