Soltústik Qazaqstan Reseı órt sóndirýshileri birlesken jattyǵý ótkizdi

PETROPAVL. 23 maýsym. Soltústik Qazaqstan oblysy men Reseı Federasııasynyń shekaralas aımaqtarynda tótenshe jaǵdaılardyń, qaýipti tabıǵı apattardyń aldyn alý boıynsha birlesken oqýlar, jattyǵýlar alǵash ret 2012 jyly ótken bolatyn.  Sodan beri úzbeı uıymdastyrylyp keledi.Qos tarapqa paıdasy mol dástúr bıyl da jalǵasyn tapty.  Bul týraly oblystyq tótenshe jaǵdaılar jónindegi departamenttiń mamandary habarlady. Jazdyń ystyq kúnderine qaramastan Qorǵan oblysy Petýhov aýdany Zotına aýylyna taıaý jazyq dalaǵa quramynda 50 tehnıka birligi, 180-ge jýyq adam kúshi bar eki oblystyń azamattyq qorǵanys jáne tótenshe jaǵdaılar, avarııalyq-qutqarý qyzmetteri, jedel medısınalyq kómek bólimsheleriniń jeke quramdary ornalasyp, qysqa nusqaýlyqtardan keıin jedel iske kiristi.  Aldymen otty abaısyz paıdalaný saldarynan qyzyl jalynǵa   oranǵan orman alqaptaryna jedel kómek kelip jetti. Tabıǵı apattyń ekpinin qaıtarý úshin qoldaǵy kúsh pen tehnıka quraldary utymdy paıdalanyldy.  «Tilsiz jaýdyń» saldarynan avtojolda jolaýshylary bar «Moskvıch» kóligi órtene bastaǵanyn baıqaǵan qutqarýshylar birden kómek qolyn sozdy. Zardap shekken adamdarǵa alǵashqy medısınalyq jedel járdem kórsetilip, Petýhov aýdandyq ortalyq aýrýhanasyna aparyldy. О́rtke qarsy qyzmet bólimderi osylaısha birlese qımyldap, sheberlikterin kórsetti. Qysqa merzim ishinde órt oshaqtary tolyǵymen  joıyldy. О́rt sóndirý shtaby qalyptasqan jaǵdaıdy esepke ala otyryp, oqý-jattyǵý jumystaryna úılesimdi basshylyq etti. Qorǵan oblystyq tótenshe jaǵdaılar basqarmasy basshysynyń orynbasary Alekseı Tkachev oqý-jattyǵýdyń joǵary deńgeıde uıymdastyrylǵanyn, Qazaqstan men Reseıdiń órt sóndirýshileriniń úılesimdi áreketin, tehnıkany bilikti basqarýyn, oqý-jattyǵý jetekshileriniń órtti sóndirý barysyndaǵy operatıvti jaǵdaıdy taldaýyn oń baǵalady. Áriptester orman órtterimen kúresý tájirıbesimen bólisip, orman sharýashylyǵy uıymdarynyń arasyndaǵy úılestirý máselelerine erekshe toqtaldy. Soltústik Qazaqstan oblystyq tótenshe jaǵdaılar departamenti basshysynyń orynbasary Nurlan Atyǵaev adam ómirine erekshe qaýip tóndiretin tabıǵattyń aıtyp kelmes tilsiz apattarynyń aldyn alýdyń mańyzdylyǵyna toqtaldy. «Búgingi oqýlar birlesken kúshpen tótenshe jaǵdaılarǵa qarsy kúreste tıimdi nátıjelerge qol jetkizýge bolatynyń kórsetti.  Eki memlekettiń shekarasyn órt shalmaıtynyna senimdimiz», dedi Nurlan Baýyrjanuly. О́mir Esqalı. Derek, sýret: Soltústik Qazaqstan oblystyq tótenshe jaǵdaılar jónindegi departamenti.