JES «Qazhrom» TUK» AQ quramyndaǵy Dóń ken baıytý kombınatynyń mańynda salyndy. 155 gektar aýmaqta ornalasqan jel elektr stansasynda aldaǵy ýaqytta jylyna 500 mıllıon KV/saǵ-tan astam elektr qýaty óndirilmekshi. Bul 440 myń tonnaǵa deıin kómirqyshqyl gazy shyǵaryndylaryn azaıtyp, 300 myń tonnadan astam kómirdi únemdeýge múmkindik beredi. Aıta ketý kerek, 2024 jyldyń jeltoqsanynda Hromtaý JES-niń alǵashqy eki qondyrǵysy elektr qýatyn óndire bastasa, 2025 jyldyń 1 qańtarynda alǵashqy mıllıon KV/saǵ berdi. Búginde barlyq týrbınalar qondyrylyp bitti. Strategııalyq jobaǵa «Eurasian Resources Group» (ERG) 74 mlrd teńgeden astam ınvestısııa quıyp, Qazaqstannyń Damý banki qarjylaı qoldady. Jel generatorlarynda óndirilgen elektr qýaty Dóń ken baıytý kombınatynyń qarqyndy túrde ósip kele jatqan qajetiligin de óteıtin bolady.
«Hromtaý» jel elektr stansasynyń iske qosylýy Konstıtýsııa kúni jáne Shahter kúnimen tuspa-tus kelgen aıtýly oqıǵa ekendigin atap ótti Aqtóbe oblysynyń ákimi Ashat Shaharov. «О́ndirisi qarqyndy damyp kele jatqan, turǵyndarynyń ósimi de joǵary Hromtaý aýdanynyń áleýmettik-ekonomıkalyq damýynda «Eurasian Resources Group» (ERG) kompanııasynyń úlesi zor. Búgin de balamaly energetıkany damytý boıynsha elimizdegi eń iri jobanyń iske asyrylǵanyna kýá bolyp otyrmyz. «Qazhrom» TUK» AQ – 30 jyldan beri áleýmettik jaýapkershilikti moınyna alǵan kompanııa. Birneshe áleýmettik nysandar turǵyzdy, basqa da máselelerdi sheship keledi. Byltyr kúzde dál osy jerde birneshe qondyrǵy ornata bastaǵanyna kýá bolǵanbyz. Qysqa merzimde Qytaı kompanııasy árqaısysy 6 MVt bolatyn elektr qýatyn óndiretin qondyrǵylardy ornatyp úlgerdi.
«Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Prezıdent Joldaýyna sáıkes, Aqtóbe oblysynda ınvestısııalar men ınnovasııaǵa, zamanaýı óndiristi damytýǵa basymdyq berilip keledi. О́ńirde negizgi kapıtalǵa salynǵan ınvestısııa kólemi jyl basynan beri 590,1 mlrd teńgege jetip, ótken jyldyń osy kezeńimen salystyrǵanda, 52,7 %-ǵa ósti. Bul kórsetkishter Aqtóbe oblysynyń joǵary ınvestısııalyq áleýetin jáne bıznes tarapynan senimniń artyp kele jatqanyn kórsetedi. Al «Hromtaý» jel elektr stansasynda 25 jańa jumys orny ashylady», dedi óńir basshysy.
«Búgin Aqtóbe oblysynda ERG-nyń alǵashqy jel energetıkasy jobasyn iske qosý saltanatyna kýá bolyp otyrmyz. Bul – Prezıdentimiz Qasym-Jomart Toqaevtyń tapsyrmasyna sáıkes oryndalǵan elimizdegi jańartylatyn qýat kózderiniń úlesin arttyrýdy kózdeıtin megajoba. Bizdiń kompanııa 150 MVt elektr qýatyn óndiretin jobany Aqtóbe oblysynda eń birinshi bolyp iske asyrdy. Osy «Hromtaý» jel elektr stansasyna 74 mlrd teńge qarjy jumsadyq.
2023 jyly Top dekarbondaý strategııasyn qabyldap, ony Dýbaıda ótken dúnıejúzilik klımat sammıtinde tanystyrdyq. Sol ýaqyttan beri strategııany qoldap qana qoımaı, qarjylandyrýdy bastap, qysqa merzimde iske asyrdyq. Aldaǵy ýaqytta «jasyl» energetıka jobalaryn elimizde basqa salalarda da damyta beremiz. Biz álemde joǵary sapasymen tanylǵan hrom keni ónimderin ekologııalyq turǵydan taza óndire otyryp, burynǵydan da básekege qabilettirek etýge tyrysamyz. Osylaısha, ERG metallýrgııany bolashaqtyń ajyramas bóligine aınaldyrady. Osy jerde jobamyzdy qarjylaı qoldaǵan Damý banki basshylyǵyna, qondyrǵylardy qysqa merzimde ornatqan tehnologııalyq áriptesimiz «PowerChina» kompanııasyna erekshe alǵysymdy bildiremin», dep atap kórsetti ERG Dırektorlar keńesiniń tóraǵasy, bas atqarýshy dırektory Shýhrat Ibragımov.
ERG 2023 jyly qolǵa alǵan dekarbondaý strategııasyna sáıkes, 300 mln AQSh dollaryn quraıtyn ınvestısııany júzege asyrmaqshy. Máselen, Temir keni dıvızıonynda Qashar jylý ortalyǵy gazǵa aýystyrylsa, allıýmınıı dıvızıonynda býdy tutynýdy azaıtý baǵdarlamasy engiziledi, jańa kalsınasııa peshteri men qarashirindi óndirisin jetildirý jumystary júrip jatyr. Sondaı-aq Aqtóbe ferroqorytpa zaýytynda qaıtalama qýat kózderin elektr toǵyna aınaldyratyn stansa salynyp jatyr.
«Qazaqstannyń Damý banki elimizdegi jańartylatyn energetıka salasyndaǵy jobalardy qarjylandyrýǵa basymdyq beredi. Biz osylaısha eldiń dekarbondaý maqsattaryna jáne energetıkalyq qaýipsizdigin qamtamasyz etýge úles qosatyn jańa generasııa kózderiniń qurylysyn qoldaımyz. «Hromtaý» JES – damý ınstıtýttary men bıznestiń birigip, elimiz «jasyl» ekonomıkasynyń negizin qalaıtyn aýqymdy jobalardy júzege asyra bastaǵanynyń dáleli», dep atap ótti Qazaqstannyń Damý banki basqarma tóraǵasynyń orynbasary. Sharaǵa qatysqan QHR Bas konsýldyǵynyń Aqtóbedegi ókili qurylystyń qysqa merzimde óte sátti oryndalǵanyn atap ótti.
Saltanatty rásimnen soń óńir basshysy Ashat Shaharov pen ERG Dırektorlar keńesiniń tóraǵasy, bas atqarýshy dırektory Shýhrat Ibragımov Hromtaý qalasynda ótken Shahter kúni merekesine qatysyp, taý-ken salasynda eńbek etetin óndiris ozattaryn marapattady.
Aqtóbe oblysy
