Sýretti túsirgen – Esenjol Isabek
Atalǵan qundy mura mýzeıge 1953 jyly tapsyrylǵan. Jádigerdi týystary kóp jyl boıy jerge kómip saqtaǵan eken.
Mekemeniń bólim basshysy Jeńisbek Qadyrulynyń aıtýynsha, saýyt qysqa jeńdi, taza temir shynjyrlardan jasalǵan. Shynjyrlar jartylaı úzilgen. Jalpy salmaǵy 15 kılony quraıdy.
«Saýytty Malaısary batyr bozbala shaǵynda kıgen. Onyń temir shynjyrlaryn kezinde týystary ózderine eskertkish zat retinde bir-birden sheship alǵan desedi. Tipti kıe tutyp, yrymdap alǵandar da bolǵan. Mýzeıge ótken mura kóbe saýytqa uqsas, kebenek syrtynan kııýge arnalǵan. Saýyt alǵashqy tapsyrylǵan qalpynda saqtalǵan», deıdi J.Qadyruly.
Malaısary batyr ǵana emes, bıdiń rólin de atqarǵan. Ol shamamen 1700–1756 jyldar aralyǵynda ómir súrgen. Tarıhshylardyń málimetine súıensek, Malaısary – Abylaı hannyń senimdi serigi. Qazaqtyń Reseı qol astyna kirýine qarsy kúresken jáne qazaq-qalmaq soǵysyn toqtatýǵa zor úlesin qosqan. Eki handyq arasynda beıbit kelisim jasaý saıasatyn ustanǵandardyń biri bolǵan.
1741–1742 jyldary Abylaı handy tutqynnan qaıtarý jóninde júrgizilgen kelissózder barysynda Qaldan-Seren Malaısaryǵa «tarhan» ataǵyn berdi. «Tarhan» ataǵy – kóneden kele jatqan laýazym, dáreje. Bul ataqtyń ıeleri alym-salyqtan bosatylǵan, usaq qylmys úshin han aldynda ǵana jaýap bergen.
Pavlodar oblysy
