Kúzde Memleket basshysy Meksıkaǵa saparmen barady

ASTANA. 23 maýsym. Astanada Qazaqstan Respýblıkasynyń syrtqy ister mınıstri Erlan Ydyrysov Meksıka Parlamenti Senatynyń komıtet tóraǵasy, Ulttyq Áreket partııasynyń múshesi Gabrıela Kýevaspen kezdesti. Bul týraly syrtqy ister mınıstrliginiń baspasóz qyzmetine silteme jasaǵan «QazAqparat» habarlady. Kezdesý barysynda taraptar ekijaqty yntymaqtastyqtyń jaǵdaıy men damý perspektıvalaryn talqylady. Qazaqstannyń syrtqy ister mınıstri atap ótkendeı yqpaldastyq jańa deńgeıge kóterilip keledi. Erlan Ydyrysov: «Meksıka Úkimetiniń bıylǵy jyly Astanada Elshilik ashý týraly sheshimi buǵan dálel bola alady. Biz bul máselede barlyq qoldaý kórsetýge daıynbyz», – dedi. Budan basqa, syrtqy saıası vedomstvo basshysy munaı-hımııalyq, mashına jasaý, taý-ken óndirisi, metallýrgııalyq, toqyma jáne taǵam ónerkásibi salalarynda Meksıkamen tyǵyz yntymaqtastyqty damytýǵa múddeli ekenin aıtty. Ol úshin jetekshi meksıkalyq kompanııalardy qazaqstandyq bıznespen aýyl sharýashylyǵynda, taǵam ónimderin óndirýde yntymaqtastyqqa shaqyrdy. Qazaqstannyń Dúnıejúzilik saýda uıymyna kirýi týraly kelissózder aıaqtalǵanyn nazarǵa ala otyryp, mınıstr kúzge josparlanǵan Prezıdent Nursultan Nazarbaevtyń Meksıkaǵa sapary barysynda qosarlanǵan salyqty boldyrmaý týraly konvensııaǵa jáne ózara ınvestısııalardy qorǵaý týraly kelisimge qol qoıýdy, sondaı-aq Qazaqstannyń meksıkalyq vızalardy elektrondyq rastaý júıesine enýi týraly máseleni qaraýdy usyndy. Kezdesý sońynda mınıstr Qazaqstannyń 2017-2018 jyldary BUU Qaýipsizdik Keńesiniń turaqty emes músheligine kandıdatýrasyn 2013 jyly qoldaǵany úshin Meksıka tarapyna alǵys aıtty. «Múshelikke saılaný - elimizdiń syrtqy saıasatyndaǵy basty mindetterdiń biri», – degen Erlan Ydyrysov Meksıkanyń BUU Qaýipsizdik Keńesindegi mol tájirıbesin zerdeleýge Qazaqstannyń yntaly ekenin aıta ketti. Al Gabrıela Kýevas Meksıka Qazaqstannyń ishki saıasattaǵy jáne halyqaralyq arenadaǵy jetistikterin jiti baqylap otyrǵanyn, sondaı-aq ár salada ekijaqty yntymaqtasty damytýǵa daıyn ekenin jetkizdi. Talǵat Raıymbek. Derek, sýret: «QazAqparat».