Foto: vıdeodan skrın
2025 jylǵy 21 tamyzda Týrızm jáne sport mınıstrliginiń qumar oıyndar men lotereıany retteý komıtetine azamat S.-nyń ótinishi men Qarjylyq monıtorıng agenttiginiń zańsyz lotereıa ótkizý faktisi boıynsha hattamasy kelip túsken. Atalǵan lotereıa Instagram áleýmettik jelisindegi «zhanabylov_e» akkaýntynda ótkizilgen.
Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń málimetinshe, is materıaldaryna sáıkes, Janábilov paraqshasynda júıeli túrde aqshalaı qarajatty, 10 avtokólikti jáne ózge de baǵaly syılyqtardy oınatqan. Oıynǵa qatysý sharttarynyń biri - Janábilovtiń jubaıy basqaratyn «Zhana Business» JShS-niń «oqytý kýrstaryna» 30 000 teńge tóleý bolǵan. Jeńimpazdar «sáttilik barabany» qurylǵysy arqyly kezdeısoq tańdaý ádisimen anyqtalǵan, bul lotereıa qyzmetiniń belgileri ekeni anyqtalǵan.
Isti qaraý barysynda Komıtet Janábilovty oqytý kýrstaryn satý túrindegi lotereıany zańsyz uıymdastyryp, ótkizgeni úshin QR lotereıa týraly zańnamasyn buzdy dep tanýdy jáne ony ákimshilik jaýapkershilikke tartýdy surap, sotqa ótinish bildirgen.
Al Janábilovtyń ókili jeke qaýly shyǵarýdy jáne ákimshilik isti toqtatýdy surady.
Is boıynsha kelesi sot otyrysy 2025 jylǵy 15 qyrkúıekke taǵaıyndaldy.
